Revelation 13

¹Ahagarara ku musenyi wo ku kiyaga. Hanyuma mbona igikoko ciburuka kiva mu kiyaga, gifise amahembe icumi n'imitwe indwi. Ku mahembe yaco hariho imigara icumi, no ku mitwe yaco hariho amazina yo gutyoza.

²Ico gikoko nabonye casa n'ingwe, amajanja yaco yari ameze nk'ayo ikirara, akanwa kaco kari kameze nk'ako intambwe. Ca gisato kigiha ububasha bwaco, no kuja ku butware bwaco, n'ubutware buhambaye.

³Muri ya mitwe yaco mbonamwo umwe usa n'uwukomeretse ugira ucikane. Uruguma rwocishe rurakira. Isi yose ikurikira ico gikoko bagitangarira.

⁴Batazira ico gisato bagisenga, kuko cahaye ico gikoko ububasha bwaco; batazira na kino gikoko bagisenga bati: “Ni nde ahwanye n'iki gikoko, kandi ni nde ashobora kukirwanya?”

⁵Gihabwa akanwa kavuga ibihambaye n'ivyo gutyoza Imana. Gihabwa n'ubushobozi bwo gushishikara amezi mirongo ine n'abiri.

⁶Giteranura akanwa kaco gityoza Imana, gityoza n'izina ryayo, n'ihema ryayo, n'ababa mw'ijuru.

⁷Gihabwa kurwanya abera no kubanesha, kandi gihabwa gutwara imiryango yose, amoko yose, indimi zose n'amahanga yose.

⁸Kandi ababa kw'isi bose bazogisenga, kandi kizosengwa n'uwuba kw'isi wese izina ritanditswe mu gitabo c'ubugingo c'Umwagazi w'Intama yatanzwe ko ishikanwa uhereye ku kuremwa kw'isi.

⁹Namba hari umuntu ari n'ugutwi ni yumve.

¹⁰Namba umuntu yagerewe gufatwa mpiri azofatwa mpiri; namba umuntu yicisha inkota akwiye kuzokwicishwa inkota. Aho ni ho ukwihangana kw'abera guserukira bo n'ukwizera kwabo.

¹¹Kandi mbona ikindi gikoko gisokorotse mw'isi; gifise amahembe abiri nk'ayo umwagazi w'intama, kivuga nk'igisato.

¹²Kiganzisha ububasha bwose bwa ca gisato ca mbere mu maso yaryo, kigobera isi n'abayibako gusenga ca gikoko ca mbere, cakize uruguma rwocishe.

¹³Kandi gikora ibimenyetso bihambaye, kimanura umuriro uva mw'ijuru utibukira kw'isi mu maso y'abantu.

¹⁴Kizimirisha ababa kw'isi ibimenyetso cahawe gukorera mu maso ya ca gikoko, kibarira ababa kw'isi gukora igishusho ca ca gikoko cari n'uruguma rw'inkota, kigahava kikabaho.

¹⁵Gihabwa guha ico gishusho c'igikoko guhumeka, ngo ico gishushanyo c'igikoko kivuge, kandi cicishe abatazogisenga bose.

¹⁶Kigera ko bose, aboroshe, abahambaye, abatunzi, aboro, abidegemvya n'abakozi, bashirwako ikimenyetso ku kiganza c'i buryo canke mu ruhanga.

¹⁷Kandi ko hatagira umuntu yemererwa kugira ico agura canke ico ashora, atari uwufise ico kimenyetso, ni co zina rya ca gikoko canke igitigiri c'izina ryaryo.

¹⁸Aho ni ho ubwenge buserukira. Uwufise ubwenge n'aharure igitigiri c'ico gikoko. Ni igitigiri c'umuntu. Igitigiri caco ni amajana atandatu na mirongo itandatu na gatandatu.