Titus 1

¹Jewe Pahulo, umushumba w'Imana, intumwa ya Yesu Kristo, ndabiherewe kwizeza abo Imana yatoranije no kwigisha kumenya ivyo ukuri gufatanije n'ukwubaha Imana.

²Nkora nizigiye kuzoronka ubugingo budashira, ubwo Imana itazi kubesha yasezeranye kera, ibihe vyose bitarabaho.

³Ariko mu bihe yitoranirije yerekanishije ijambo ryayo ubutumwa najejwe, nk'uko Imana Umukiza wacu yageze.

⁴Ndakwandikiye Tito, umwana wanje nyakuri kubwo ukwizera dusangiye. Ubuntu n'amahoro bikubeko biva ku Mana Data wa twese no kuri Kristo Yesu Umukiza wacu.

⁵Icatumye ndagusiga i Kirete kwari ukugira ngo utunganye ivyasigaye, kandi mu gisagara caho cose ngo uhashinge abakuru b'ishengero, nk'uko nabikubariye.

⁶Abe umuntu atabonekako umugayo, afise umugore umwe gusa, afise abana bizera, bataregwa ko ari ibihumbu canke itagonda.

⁷Kuko umuzezwashengero akwiye kutabako umugayo, nk'umukuru w'abakozi bo mu rugo w'Imana nyene; kandi ntakwiye kuba uwudakurwa kw'ijambo, ushangashirwa, umunywi w'umuvinyu, umusinzi canke uwunohokera inyungu mbi.

⁸Ariko abe uwukunda gutanga indaro, akunda ivyiza, yitonda, agororoka, yera, yirinda,

⁹agumya ijambo ryo kwizerwa rihura n'ukwigisha kwacu, kugira ngo abone guhanura abantu mu kwigisha kuzima no gutsinda abamuhaririza.

¹⁰Kuko hariho benshi b'intagondwa, canecane n'abo mu bahimbuwe igikoba c'ubugabo, bavuga ibitagira ikimazi, n'inyosha mbi.

¹¹Bakwiye kuzibwa iminwa, kuko hari imiryango bagwisha igahenebera, bigisha ibidakwiye kubwo inyungu mbi.

¹²Umwe muri bo w'umuvugishwa wabo yaravuze ati: Na ntaryo Abanyakirete, ababeshi, ibikoko bibi n'abanebwe b'abakunzi b'inda.

¹³Iyo ntahe yashinze ni iyo ukuri. Ni co gituma ukwiye kubahana cane, kugira ngo babe abahangaye mu kwizera,

¹⁴ntibashire imitima ku migani y'ibinyoma y'Abayuda no ku vyagezwe vy'abantu batera ibitugu ukuri.

¹⁵Ku badahumanye nta gihumanye, ariko ku banduye, batizera, nta kidahumanye, ariko ubwenge bwabo n'imitima ibagiriza vyaranduye.

¹⁶Bavuga yuko bazi Imana, ariko bayihakanisha ivyo bakora; n'abo kwankwa urunuka, n'abatumvira Imana, no mu bikorwa vyiza vyose nta co bamaze.