Psalms 102

¹GBỌ adura mi, Oluwa, ki o si jẹ ki igbe mi ki o wá sọdọ rẹ.

²Máṣe pa oju rẹ mọ́ kuro lara mi li ọjọ ti emi wà ninu ipọnju; dẹ eti rẹ si mi: li ọjọ ti mo ba pè, da mi lohùn-lọgan.

³Nitori ti ọjọ mi run bi ẹ̃fin, egungun mi si jona bi àro.

⁴Aiya mi lù, o si rọ bi koriko; tobẹ̃ ti mo gbagbe lati jẹ onjẹ mi.

⁵Nitori ohùn ikerora mi, egungun mi lẹ̀ mọ ẹran-ara mi.

⁶Emi dabi ẹiyẹ ofú ni iju: emi dabi owiwi ibi ahoro.

⁷Emi nṣọra, emi dabi ologoṣẹ nikan ni ori ile.

⁸Awọn ọta mi ngàn mi li ọjọ gbogbo; ati awọn ti nṣe ikanra si mi, nwọn fi mi bu.

⁹Emi sa jẹ ẽru bi onjẹ, emi si dà ohun mimu mi pọ̀ pẹlu omije.

¹⁰Nitori ikannu ati ibinu rẹ; nitori iwọ ti gbé mi soke, iwọ si gbé mi ṣanlẹ.

¹¹Ọjọ mi dabi ojiji ti o nfà sẹhin; emi si nrọ bi koriko.

¹²Ṣugbọn iwọ, Oluwa, ni yio duro lailai; ati iranti rẹ lati iran dé iran.

¹³Iwọ o dide, iwọ o ṣãnu fun Sioni: nitori igba ati ṣe oju-rere si i, nitõtọ, àkoko na de.

¹⁴Nitori ti awọn iranṣẹ rẹ ṣe inu didùn si okuta rẹ̀, nwọn si kãnu erupẹ rẹ̀.

¹⁵Bẹ̃li awọn keferi yio ma bẹ̀ru orukọ Oluwa, ati gbogbo ọba aiye yio ma bẹ̀ru ogo rẹ.

¹⁶Nigbati Oluwa yio gbé Sioni ró, yio farahan ninu ogo rẹ̀.

¹⁷Yio juba adura awọn alaini, kì yio si gàn adura wọn.

¹⁸Eyi li a o kọ fun iran ti mbọ̀; ati awọn enia ti a o da yio ma yìn Oluwa.

¹⁹Nitori ti o wò ilẹ lati òke ibi-mimọ́ rẹ̀ wá; lati ọrun wá ni Oluwa bojuwo aiye;

²⁰Lati gbọ́ irora ara-tubu; lati tú awọn ti a yàn si ikú silẹ;

²¹Lati sọ orukọ Oluwa ni Sioni, ati iyìn rẹ̀ ni Jerusalemu.

²²Nigbati a kó awọn enia jọ pọ̀ ati awọn ijọba, lati ma sìn Oluwa.

²³O rẹ̀ agbara mi silẹ li ọ̀na; o mu ọjọ mi kuru.

²⁴Emi si wipe, Ọlọrun mi, máṣe mu mi kuro li agbedemeji ọjọ mi: lati irandiran li ọdun rẹ.

²⁵Lati igba atijọ ni iwọ ti fi ipilẹ aiye sọlẹ: ọrun si ni iṣẹ ọwọ rẹ,

²⁶Nwọn o ṣegbe, ṣugbọn Iwọ o duro; nitõtọ gbogbo wọn ni yio di ogbó bi aṣọ; bi ẹ̀wu ni iwọ o pàrọ wọn, nwọn o si pàrọ.

²⁷Ṣugbọn bakanna ni Iwọ, ọdun rẹ kò li opin.

²⁸Awọn ọmọ awọn iranṣẹ rẹ yio duro pẹ, a o si fi ẹsẹ iru-ọmọ wọn mulẹ niwaju rẹ.