Psalms 124

¹IBA máṣe pe Oluwa ti o ti wà fun wa, ki Israeli ki o ma wi nisisiyi;

²Iba máṣe pe Oluwa ti o ti wà fun wa, nigbati awọn enia duro si wa:

³Nigbana ni nwọn iba gbé wa mì lãye, nigbati ibinu nwọn ru si wa:

⁴Nigbana li omi wọnni iba bò wa mọlẹ, iṣan omi iba ti bori ọkàn wa:

⁵Nigbana li agberaga omi iba bori ọkàn wa.

⁶Olubukún li Oluwa, ti kò fi wa fun wọn bi ohun ọdẹ fun ehin wọn.

⁷Ọkàn wa yọ bi ẹiyẹ jade kuro ninu okùn apẹiyẹ: okùn já, awa si yọ.

⁸Iranlọwọ wa mbẹ li orukọ Oluwa, ti o da ọrun on aiye.