شوَع 12

¹مخکې له دې چې موسیٰ مړ شي هغه او د اسراییلو خلکو د اردن د سیند د ختیځې خوا دوو پادشاهانو ته ماتې ورکړه. دې دوو پادشاهانو په هغې سیمې باندې چې د ارنون له درې څخه د حرمون تر غره پورې رسېدله او په هغې کې د اردن د درې ختیځه خوا هم شامله وه حکومت کاوه.

²سیحون د اموریانو پادشاه ؤ چې په حشبون کې یې پادشاهي کوله. هغه له عروعیر څخه چې د ارنون د درې په څنګ کې ؤ او د درې له منځ څخه د یبوق تر سیند پورې چې د عمونیانو پوله وه پادشاهي کوله. په دې کې نیم جلعاد شامل ؤ.

³په هغې کې د اردن دره د جلیل له جهیل څخه جنوب خواته د بیت یشیموت (د ارام دریاب ختیځ ته) او پیسګاه د غره تر لمنې پورې شامل وو.

⁴همدارنګه موسیٰ او اسراییلیانو د باشان پادشاه عوج ته چې د پاتې شویو رفائیانو څخه ؤ هم ماتې ورکړه. هغه په عشتاروت او ادرعي کې پادشاهي کوله.

⁵د هغه په پادشاهۍ کې د حرمون غر، سلخه او ټول باشان د جشور او معکې تر پولې او همدارنګه نیم جلعاد د حشبون د پادشاه سیحون تر سیمې پورې شامل وو.

⁶موسیٰ او د اسراییلو قوم دغو دوو پادشاهانو ته ماتې ورکړه. د څښتن خدمتګار موسیٰ د هغوی خاوره د روبین او جاد قبیلو ته او د منسي نیمې قبیلې ته د هغوی د ملکیت په توګه ورکړه.

⁷یوشع او د اسراییلو قوم هغو پادشاهانو ته چې د اردن د سیند په لوېدیځه خوا کې وو ماتې ورکړه، یعنې له بعل جاد څخه چې د لبنان په دره کې پروت ؤ د حالق تر غره پورې چې په جنوب کې ادوم ته نژدې ؤ. یوشع هغه ځمکه د اسراییلو د قبیلو ترمنځ ووېشله او د ملکیت په توګه یې هغوی ته ورکړه.

⁸کومه ځمکه چې یوشع د هغوی په منځ کې ووېشله په هغې کې دا ځایونه شامل وو: غرنۍ سیمه، د غرونو لوېدیځې لمنې، د اردن دره، د غرونو ختیځې ډډې او د کنعان جنوبي دښته. دا ځمکه د حیتیانو، اموریانو، کنعانیانو، فرزیانو، حویانو او یبوسیانو وطن ؤ.

⁹د اسراییلو قوم د لاندینیو ښارونو پادشاهانو ته ماتې ورکړه: اریحا، عای (بیت ئیل ته نژدې)،

¹⁰اورشلیم، حبرون،

¹¹یرموت، لاکیش،

¹²عجلون، جازر،

¹³دبیر، جدر،

¹⁴حرما، عراد،

¹⁵لبنه، عدولام،

¹⁶مقیده، بیت ئیل،

¹⁷تفوح، حافر،

¹⁸عفیق، لشارون،

¹⁹مادون، حاصور،

²⁰شمرون مرون، اخشاف،

²¹تعنک، مجدو،

²²قادش، یقنعام (په کرمل کې)،

²³دور (د دور په لوړو سیمو)، قوئیم (په جلیل کې)

²⁴او ترزه. د ټولو پادشاهانو شمېر یو دېرشو ته رسېده.