SABUURRADII 119

¹Waxaa barakaysan kuwa jidka ku qumman, Oo sharciga Rabbiga ku socda.

²Waxaa barakaysan kuwa dhawra markhaatifurkiisa, Oo Rabbiga ku doondoona qalbiga oo dhan.

³Haah, oo xaqdarro ma sameeyaan, Jidadkiisase way ku socdaan.

⁴Waxaad nagu amartay amarradaada, Inaan aad u dhawrno.

⁵Aad baan u jeclaan lahaa in jidadkayga la hagaajiyo Inaan qaynuunnada dhawro!

⁶Markaas anigu ceeboobi maayo, Markaan dhawro amarradaada oo dhan.

⁷Markaan barto xukummadaada xaqa ah Ayaan qummanaanta qalbiga kuugu mahadnaqi doonaa.

⁸Waxaan dhawri doonaa qaynuunnadaada, Rabbow, ha i dayrin weligay.

⁹Bal nin dhallinyaro ahu muxuu jidkiisa ku nadiifiyaa? Waa inuu aad ugu fiirsado si eraygaaga waafaqsan.

¹⁰Waxaan kugu doondoonay qalbigayga oo dhan, Yaanan amarradaada ka leexan.

¹¹Waxaan eraygaagii qalbigayga ugu kaydsaday Si aanan kuugu dembaabin.

¹²Rabbiyow, adigaa mahad leh, Haddaba qaynuunnadaada i bar.

¹³Waxaan bushimahayga ku sheegay Xukummadii afkaaga oo dhan.

¹⁴Waxaan ku reyreeyey jidka markhaatifurkaaga, Sidaan ugu rayrayn lahaa taajirnimada oo dhan.

¹⁵Waxaan aad ugu fiirsan doonaa amarradaada, Oo jidadkaagaan dhawri doonaa.

¹⁶Qaynuunnadaada waan ku farxi doonaa, Eraygaagana ma illoobi doono.

¹⁷Anoo addoonkaaga ah wax badan oo wanaagsan ii samee, si aan u noolaado, Oo sidaasaan eraygaaga u dhawri doonaa.

¹⁸Indhahayga fur Si aan waxyaalo yaab badan sharcigaaga uga arko.

¹⁹Socotaan dhulka ku ahay, Haddaba amarradaada ha iga qarin.

²⁰Naftaydu waxay u xiisootay Jacaylkay had iyo goorba u qabto xukummadaada.

²¹Waxaad canaanatay kuwa kibirsan oo inkaaran, Oo amarrada ka leexda.

²²Cay iyo ceeb iga fogee, Waayo, markhaatifurkaaga waan xajiyey,

²³Oo weliba amiirraa fadhiistay oo wax iga gees ah ka wada hadlay, Laakiinse anoo addoonkaaga ah aad baan uga fiirsaday qaynuunnadaada.

²⁴Markhaatifurkaagu waa waxa iga farxiya, Waana lataliyayaashayda.

²⁵Naftaydu waxay ku dhegtaa ciidda, Haddaba ii noolee si eraygaaga waafaqsan.

²⁶Waxaan kuu sheegay jidadkaygii, oo adna waad ii jawaabtay, Bal qaynuunnadaada i bar.

²⁷Jidka amarradaada i garansii, Oo sidaasaan aad ugu fiirsan doonaa shuqulladaada yaabka badan.

²⁸Naftaydu waxay la dhacdaa murug, Haddaba ii xoogee si eraygaaga waafaqsan.

²⁹Jidka beenta iga fogee, Oo si raxmad leh sharcigaaga ii sii.

³⁰Waxaan doortay jidka aaminnimadaada, Oo waxaan hortayda dhigay xukummadaadii.

³¹Markhaatifurkaaga waan xajiyaa, Rabbiyow, ha i ceebayn.

³²Waxaan ku ordi doonaa jidka amarradaada Markii aad qalbigayga ballaadhisid.

³³Rabbiyow, jidka qaynuunnadaada i bar, Waanan xajin doonaa tan iyo ugu dambaysta.

³⁴Waxgarasho i sii, oo anna sharcigaaga waan xajin doonaa, Haah, oo waxaan ku dhawri doonaa qalbigayga oo dhan.

³⁵Igu kexee waddada amarradaada, Waayo, kaasaan ku farxaa.

³⁶Qalbigayga u soo jeedi xagga markhaatifurkaaga, Oo ha u leexin xagga faa'iidada xaqdarrada ah.

³⁷Indhahayga inay fiiriyaan wax aan micne lahayn ka sii jeedi, Oo jidadkaaga igu noolee.

³⁸Eraygaaga ii xaqiiji anoo addoonkaaga ah Oo doonaya inaan kaa cabsado.

³⁹Caydayda aan ka cabsanayo iga leexi, Waayo, xukummadaadu waa wanaagsan yihiin.

⁴⁰Bal eeg, waxaan u xiisooday amarradaada, Haddaba xaqnimadaada igu soo noolee.

⁴¹Rabbiyow, naxariistaada iyo weliba badbaadintaadu Ha iigu yimaadeen si eraygaaga waafaqsan.

⁴²Markaasaan jawaab u heli doonaa kan i caaya, Waayo, waxaan isku halleeyaa eraygaaga.

⁴³Oo erayga runta ahna dhammaantiis afkayga ha ka gooyn, Waayo, waxaan rajo ku qabay xukummadaada.

⁴⁴Markaasaan had iyo goorba dhawri doonaa sharcigaaga Weligay iyo weligayba.

⁴⁵Oo waxaan ku socon doonaa xorriyad, Waayo, waxaan doondoonay amarradaada.

⁴⁶Oo weliba waxaan markhaatifurkaaga ka sheegi doonaa boqorro hortooda, Mana ceeboobi doono.

⁴⁷Oo waxaan ku farxi doonaa amarradaada Aan jeclaaday.

⁴⁸Oo weliba waxaan gacmaha u hoorsan doonaa amarradaada aan jeclaaday, Oo aad baan ugu fiirsan doonaa qaynuunnadaada.

⁴⁹Xusuuso eraygii aad anoo addoonkaaga ah igula hadashay, Oo aad igu rajo gelisay.

⁵⁰Oo taasu waa i qalbi qaboojisaa markii aan dhibaataysnahay, Waayo, eraygaagaa i soo nooleeyey.

⁵¹Kuwa kibirsan aad bay iigu qosleen, Laakiinse sharcigaaga kama aan leexan.

⁵²Rabbiyow, tan iyo mar hore waxaan soo xusuusnaa xukummadaada, Waanan isqalbi qaboojiyey.

⁵³Aad baan u xanaaqay, Waana kuwa sharka leh oo sharcigaaga ka tegey aawadood.

⁵⁴Qaynuunnadaadu waxay ii ahaayeen heeso Markaan ku jiray gurigii aan socotada ku ahaa.

⁵⁵Rabbiyow, habeenkaan magacaaga soo xusuustay, Oo sharcigaagaan dhawray.

⁵⁶Taasu waa ii ahaatay, Maxaa yeelay, amarradaadii baan xajiyey.

⁵⁷Rabbigu waa qaybtayda, Oo anigu waxaan idhi, Waxaan dhawrayaa erayadaada.

⁵⁸Qalbigayga oo dhan ayaan kugu baryay inaad raalli iga ahaato, Si eraygaaga waafaqsan iigu naxariiso.

⁵⁹Waxaan ka fikiray jidadkayga, Kolkaasaan cagahayga u soo duway xagga markhaatifurkaaga.

⁶⁰Waan u degdegay, oo kama aan raagin Inaan amarradaada dhawro.

⁶¹Waxaa isku kay duudduubay xadhkihii kuwa sharka leh, Laakiinse sharcigaaga ma aan illoobin.

⁶²Waxaan kici doonaa habeenbadhka inaan kugu mahadnaqo, Waana xukummadaada caddaaladda ah daraaddood.

⁶³Anigu waxaan wehel la ahay kuwa kaa cabsada oo dhan, Iyo kuwa amarradaada dhawraba.

⁶⁴Rabbiyow, dhulka waxaa ka buuxda naxariistaada, Haddaba qaynuunnadaada i bar.

⁶⁵Rabbiyow, anoo addoonkaaga ah waxaad iila macaamilootay Si wanaagsan oo eraygaaga waafaqsan.

⁶⁶Haddaba i bar kaladoorasho wanaagsan iyo aqoon, Waayo, waxaan rumaystay amarradaada.

⁶⁷Intaan lay dhibin ka hor ayaan ambaday, Laakiinse haatan eraygaaga waan dhawraa.

⁶⁸Waad wanaagsan tahay, oo wanaag baad samaysaa, Haddaba qaynuunnadaada i bar.

⁶⁹Kuwa kibirka lahu been bay iga sheegeen, Aniguse amarradaada ayaan ku xajin doonaa qalbigayga oo dhan.

⁷⁰Qalbigoodu wuu qallafsanaaday, Aniguse waxaan ku farxaa sharcigaaga.

⁷¹Waa ii wanaagsanayd in lay dhibo, Si aan qaynuunnadaada u barto.

⁷²Sharciga afkaagu waa iiga sii fiican yahay Kumanyaal dahab iyo lacag ah.

⁷³Waxaa i sameeyey oo i qabanqaabiyey gacmahaaga, Haddaba i sii waxgarasho aan amarradaada ku barto.

⁷⁴Kuwa kaa cabsadaa way i arki doonaan, wayna farxi doonaan, Maxaa yeelay, waxaan rajo ku qabay eraygaaga.

⁷⁵Rabbiyow, waan ogahay in xukummadaadu ay xaq yihiin, Iyo inaad aaminnimo igu dhibtay.

⁷⁶Waan ku baryayaaye raxmaddaadu ha ii noqoto qalbiqaboojin Si waafaqsan eraygii aad anoo addoonkaaga ah igula hadashay.

⁷⁷Naxariistaadu ha ii timaado si aan u noolaado, Waayo, waxaa iga farxiya sharcigaaga.

⁷⁸Kuwa kibirka lahu ha ceeboobeen, waayo, si gardarro ah ayay igu afgembiyeen, Aniguse waxaan aad uga fiirsan doonaa amarradaada.

⁷⁹Kuwa kaa cabsadaa ha ii soo noqdeen, Oo waxay ogaan doonaan markhaatifurkaaga.

⁸⁰Qalbigaygu qaynuunnadaada ha ku qummanaado, Si aanan u ceeboobin.

⁸¹Naftaydu waa u taag darnaataa badbaadintaada aan u xiisoodo aawadeed, Laakiinse eraygaagaan rajo ku qabaa.

⁸²Sidii aan u lahaa, Goormaad i qalbi qaboojinaysaa? Ayaa indhahaygu u gudheen eraygaaga aawadiis.

⁸³Waayo, waxaan noqday sidii sibraar qiiq ku dhex jiro, Laakiinse innaba qaynuunnadaada ma aan illoobo.

⁸⁴Anoo addoonkaaga ah cimrigaygu waa intee? Oo goormaad xukun ku soo dejinaysaa kuwa i silciya?

⁸⁵Kuwa kibirka leh oo aan sharcigaaga waafaqsanayn Ayaa ii qoday godad.

⁸⁶Amarradaada oo dhammu waa wada daacad, Si gardarro ah ayay ii silciyaan, haddaba i caawi,

⁸⁷Dhulka ayay iga baabbi'in gaadheen, Aniguse kama aan tegin amarradaadii.

⁸⁸Raxmaddaada igu soo noolee, Oo anna waxaan dhawri doonaa markhaatifurka afkaaga.

⁸⁹Rabbiyow, eraygaagu weligiisba Wuxuu taagan yahay samada.

⁹⁰Aaminnimadaaduna waxay gaadhaa tan iyo ka ab ka ab; Dhulkaad dhistay, wuuna sii jirayaa.

⁹¹Maantadan waxay u joogaan si qaynuunnadaada waafaqsan, Waayo, wax waluba waa addoommadaada.

⁹²Haddaanu sharcigaagu iga farxin, Waxaan kol hore ku halligmi lahaa dhibaatadii i haysatay.

⁹³Weligay amarradaada ma aan illoobi doono, Waayo, iyagaad igu soo noolaysay.

⁹⁴Anigu waxaan ahay kaaga, haddaba i badbaadi, Waayo, waxaan doondoonay amarradaada.

⁹⁵Kuwa sharka lahu way ii sugeen inay i baabbi'iyaan, Aniguse waxaan ka fiirsan doonaa markhaatifurkaaga.

⁹⁶Waxaan arkay in wax kasta oo kaamil ah ay dhammaad leeyihiin, Amarkaaguse aad buu u ballaadhan yahay.

⁹⁷Aad baan sharcigaaga u jeclahay! Maalinta oo dhan isagaan u fiirsadaa.

⁹⁸Amarradaadu waxay iga dhigaan ku ka sii caqli badan cadaawayaashayda. Waayo, weligayba way ila jiraan.

⁹⁹Waan ka sii waxgarasho badnahay macallimiintayda oo dhan, Waayo, waxaan u fiirsadaa markhaatifurkaaga.

¹⁰⁰Waan ka sii waxgarasho badnahay odayaasha, Waayo, waxaan xajiyey amarradaada.

¹⁰¹Cagahayga waan ka joojiyey jid kasta oo shar leh, Si aan eraygaaga u dhawro.

¹⁰²Xukummadaada gees ugama aan leexan, Waayo, wax baad i bartay.

¹⁰³Erayadaadu dhanxanaggayga u macaan badanaa! Afkayga malab way uga sii macaan badan yihiin!

¹⁰⁴Amarradaada ayaan waxgarasho ku helaa, Oo sidaas daraaddeed ayaan jid kasta oo been ah u necbahay.

¹⁰⁵Eraygaagu wuxuu cagahayga u yahay laambad, Waddooyinkaygana iftiin.

¹⁰⁶Waxaan ku dhaartay oo aan weliba xaqiijiyey Inaan dhawrayo xukummadaada xaqa ah.

¹⁰⁷Aad iyo aad baan u dhibaataysnahay, Haddaba Rabbiyow, igu soo noolee si eraygaaga waafaqsan.

¹⁰⁸Rabbiyow, waan ku baryayaaye, aqbal qurbaannada ikhtiyaarka ah oo afkayga, Xukummadaadana i bar.

¹⁰⁹Naftaydu had iyo goorba waxay ku jirtaa khatar, Habase yeeshee sharcigaaga ma illoobo.

¹¹⁰Kuwa sharka lahu waxay ii dhigeen dabin, Laakiinse amarradaada kama aan amban.

¹¹¹Markhaatifurkaaga waxaan u qaatay sida dhaxal weligiis waaraya, Waayo, kaasu waxa weeye waxa qalbigaygu ku reyreeya.

¹¹²Qalbigayga waxaan u jeediyey inaan qaynuunnadaada oofiyo, Tan iyo weligay iyo ilaa ugu dambaysta.

¹¹³Waan necbahay kuwa labada qalbi leh, Laakiinse sharcigaaga waan jeclahay.

¹¹⁴Waxaad tahay gabbaadkayga iyo gaashaankayga, Oo waxaan rajo ku qabaa eraygaaga.

¹¹⁵Kuwiinna xumaanta falow, iga taga, Si aan amarrada Ilaahayga u xajiyo.

¹¹⁶Rabbiyow, ii tiiri si eraygaaga waafaqsan si aan u noolaado, Oo yaanan rajadayda ku ceeboobin.

¹¹⁷Kor ii hay, oo waan badbaadi doonaa, Oo had iyo goorba waxaan u fiirsan doonaa qaynuunnadaada.

¹¹⁸Kuwa qaynuunnadaada ka habaabay oo dhan waad fudaydsatay, Waayo, khiyaanadoodu waa wax been ah.

¹¹⁹Kuwa sharka leh oo dhulka oo dhan waxaad u fogaysaa sida wasakh oo kale, Oo sidaas daraaddeed baan markhaatifurkaaga u jeclahay.

¹²⁰Jidhkaygu wuxuu la gariiraa cabsidaada, Oo waxaan ka baqaa xukummadaada.

¹²¹Waxaan sameeyey xukun iyo caddaalad, Haddaba ha iiga tegin kuwa i dulma.

¹²²Anoo addoonkaaga ah wanaag daraaddiis ii dammiino, Oo kuwa kibirsanu yaanay i dulmin.

¹²³Indhahaygii waxay u gudheen jacaylkay badbaadintaada u qabaan, Iyo eraygaaga xaqa ah daraaddiis.

¹²⁴Anoo addoonkaaga ah iila macaamilow si naxariistaada waafaqsan, Oo qaynuunnadaada i bar.

¹²⁵Waxaan ahay addoonkaaga, haddaba waxgarasho i sii, Si aan markhaatifurkaaga u ogaado.

¹²⁶Waa wakhtiga aad shaqayn lahayd, Rabbiyow, Waayo, sharcigaaga way buriyeen.

¹²⁷Haddaba amarradaada waan ka sii jeclahay Dahab, haah, xataa dahab saafi ah.

¹²⁸Sidaas daraaddeed amarradaada oo dhammu waxay ila yihiin wax hagaagsan, Oo waan necbahay jid kasta oo been ah.

¹²⁹Markhaatifurkaagu waa yaab badan yahay, Oo sidaas daraaddeed ayay naftaydu u xajisaa.

¹³⁰Erayadaada furniinkoodu wax buu iftiimiyaa, Oo wuxuu waxgarasho siiyaa kuwa garaadka daran.

¹³¹Afka aad baan u kala qaaday, oo waan harraaday, Waayo, waxaan u xiisooday amarradaada.

¹³²Ii soo jeeso, oo ii naxariiso, Sidaad kuwa magacaaga jecel u samaysid.

¹³³Tallaabooyinkayga ku toosi eraygaaga, Oo dembina yaanu ii talin.

¹³⁴Dadka dulmigiisa iga bixi, Oo anna waxaan dhawri doonaa amarradaada.

¹³⁵Anoo addoonkaaga ah wejigaaga iigu iftiimi, Oo qaynuunnadaada i bar.

¹³⁶Indhahayga waxaa ka shubma durdurro biyo ah, Maxaa yeelay, sharcigaaga lama dhawrin.

¹³⁷Rabbiyow, xaq baad tahay, Oo xukummadaaduna waa qumman yihiin.

¹³⁸Markhaatifurkaaga waxaad ku amartay xaqnimo Iyo daacadnimo oo dhan.

¹³⁹Waxaa i baabba'shay qiirada aan kuu qabo, Maxaa yeelay, cadaawayaashaydu waxay illoobeen erayadaada.

¹⁴⁰Eraygaagu aad buu u daahirsan yahay, Sidaas daraaddeed anoo addoonkaaga ah waan jeclahay.

¹⁴¹Anigu waan yarahay, oo waa lay quudhsadaa, Laakiinse amarradaada ma illoobo.

¹⁴²Xaqnimadaadu waa xaqnimo weligeed sii waaraysa, Oo sharcigaaguna waa run.

¹⁴³Dhib iyo cidhiidhi baa i qabsaday. Laakiinse amarradaadu waa waxa iga farxiya.

¹⁴⁴Markhaatifurkaagu weligiisba waa xaq, Haddaba waxgarasho i sii, oo anna waan sii noolaan doonaa.

¹⁴⁵Waxaan ku qayshaday qalbigayga oo dhan, haddaba Rabbiyow, ii jawaab, Oo anna waxaan xajin doonaa qaynuunnadaada.

¹⁴⁶Waan kuu qayshaday ee i badbaadi, Oo markhaatifurkaaga waan dhawri doonaa.

¹⁴⁷Waan ka soo hor maray waaga berigiisii, oo waan qayliyey, Oo waxaan rajo ku qabay erayadaada.

¹⁴⁸Indhahaygu way ka hor mareen wakhtiga la soo jeedo oo habeennimo, Si aan eraygaaga uga fikiro.

¹⁴⁹Codkayga u maqal si raxmaddaada waafaqsan, Rabbiyow, igu soo noolee si xukummadaada waafaqsan.

¹⁵⁰Kuwii xumaatada raaci jiray way soo dhowaanayaan, Iyagu sharcigaaga way ka fog yihiin.

¹⁵¹Rabbiyow, adigu waad dhow dahay, Oo amarradaada oo dhammuna waa wada run.

¹⁵²Waxaan markhaatifurkaaga waa hore ka iqiin Inaad u aasaastay si ay weligood u sii waaraan.

¹⁵³Dhibaatadayda ka fiirso oo i samatabbixi, Waayo, anigu sharcigaaga ma illoobo.

¹⁵⁴Dacwadayda ii muddac, oo i soo furo, Igu soo noolee si eraygaaga waafaqsan.

¹⁵⁵Kuwa sharka leh badbaadadu waa ka fog tahay, Waayo, qaynuunnadaada ma ay doondoonaan.

¹⁵⁶Rabbiyow, naxariistaadu waa badan tahay, Igu soo noolee si xukummadaada waafaqsan.

¹⁵⁷Kuwa i silciya iyo cadaawayaashayduba way badan yihiin, Laakiinse anigu kama aan leexan markhaatifurkaaga.

¹⁵⁸Waxaan arkay khaa'innada, kolkaasaan murugooday, Maxaa yeelay, iyagu eraygaaga ma ay dhawraan.

¹⁵⁹Bal ka fiirso sida aan amarradaada u jeclahay, Rabbiyow, igu soo noolee si raxmaddaada waafaqsan.

¹⁶⁰Eraygaaga dhammaantiisu waa run, Mid kasta oo xukummadaada xaqa ah ka mid ahu wuu sii waaraa weligiisba.

¹⁶¹Amiirraa sababla'aan ii silciyey, Laakiinse qalbigaygu wuxuu ka baqaa erayadaada.

¹⁶²Waxaan eraygaaga ugu reyreeyaa Sidii mid booli badan helay.

¹⁶³Beenta waan necbahay oo waan karahsaday, Laakiinse sharcigaaga waan jeclahay.

¹⁶⁴Maalintiiba toddoba jeer baan ku ammaanaa, Waana xukummadaada xaqa ah daraaddood.

¹⁶⁵Kuwa sharcigaaga jecelu waxay haystaan nabad weyn, Oo wax iyaga turuntureeyaa ma jiraan.

¹⁶⁶Rabbiyow, badbaadintaada waan u xiisooday, Oo amarradaadiina waan oofiyey.

¹⁶⁷Naftaydu waxay dhawrtay markhaatifurkaaga, Oo anna aad iyo aad baan u jeclahay.

¹⁶⁸Waxaan dhawray amarradaada iyo markhaatifurkaaga, Waayo, jidadkayga oo dhammu hortaaday wada yaalliin.

¹⁶⁹Rabbiyow, qayladaydu ha ku soo dhowaato hortaada, Oo waxgarasho ii sii si eraygaaga waafaqsan.

¹⁷⁰Baryootankaygu hortaada ha yimaado, Oo ii samatabbixi si eraygaaga waafaqsan.

¹⁷¹Bushimahaygu ammaan ha ku hadleen, Waayo, waxaad i bartaa qaynuunnadaada.

¹⁷²Carrabkaygu ha ku gabyo eraygaaga, Waayo, amarradaada oo dhammu waa wada xaqnimo.

¹⁷³Gacantaadu diyaar ha u ahaato inay i caawiso, Waayo, amarradaadaan doortay.

¹⁷⁴Rabbiyow, badbaadintaada, waan u xiisooday, Oo sharcigaaguna waa waxa iga farxiya.

¹⁷⁵Naftaydu ha iska noolaato, wayna ku ammaani doontaa, Oo xukummadaaduna ha i caawiyaan.

¹⁷⁶Waxaan u hallaabay sidii lax luntay, haddaba anigoo addoonkaaga ah i doondoon, Waayo, amarradaada ma aan illoobo.