Mwanzo 15

¹Baada ya mambo hayo neno la Bwana likamjia Abramu katika njozi, likinena, Usiogope, Abramu, Mimi ni ngao yako, na thawabu yako kubwa sana.

²Abramu akasema, Ee Bwana MUNGU, utanipa nini, nami naenda zangu hali sina mtoto, na atakayeimiliki nyumba yangu ni huyu Eliezeri, Mdameski?

³Abramu akasema, Tazama, hukunipa uzao, na mtu aliyezaliwa nyumbani mwangu ndiye mrithi wangu.

⁴Nalo neno la Bwana likamjia likinena, Huyu hatakurithi, bali atakayetoka katika viuno vyako ndiye atakayekurithi.

⁵Akamleta nje, akasema, Tazama sasa mbinguni, kazihesabu nyota, kama ukiweza kuzihesabu. Akamwambia, Ndivyo utakavyokuwa uzao wako.

⁶Akamwamini Bwana, naye akamhesabia jambo hili kuwa haki.

⁷Kisha akamwambia, Mimi ni Bwana, niliyekuleta kutoka Uru wa Wakaldayo nikupe nchi hii ili uirithi.

⁸Akasema, Ee Bwana MUNGU, nipateje kujua ya kwamba nitairithi?

⁹Akamwambia, Unipatie ndama wa miaka mitatu, na mbuzi mke wa miaka mitatu, na kondoo mume wa miaka mitatu, na hua, na mwana njiwa.

¹⁰Akampatia hao wote, akawapasua vipande viwili, akaweka kila kipande kuelekea mwenzake, ila ndege hakuwapasua.

¹¹Hata tai walipotua juu ya mizoga Abramu akawafukuza.

¹²Na jua lilipokuwa likichwa usingizi mzito ulimshika Abramu, hofu ya giza kuu ikamwangukia.

¹³Bwana akamwambia Abramu, Ujue hakika ya kwamba uzao wako utakuwa mgeni katika nchi isiyo yake, watawatumikia watu wale, nao watateswa muda wa miaka mia nne.

¹⁴Hata na taifa lile, watakaowatumikia, nitawahukumu; baadaye watatoka na mali mengi.

¹⁵Lakini wewe utakwenda kwa baba zako kwa amani, utazikwa katika uzee mwema.

¹⁶Na kizazi cha nne kitarudi hapa, maana haujatimia uovu wa Waamori bado.

¹⁷Ikawa, jua lilipokuchwa likawa giza, tazama, tanuru ya moshi na mwenge unaowaka ulipita kati ya vile vipande vya nyama.

¹⁸Siku ile Bwana akafanya agano na Abramu, akasema, Uzao wako nimewapa nchi hii, kutoka mto wa Misri mpaka huo mto mkubwa, mto Frati,

¹⁹Mkeni, na Mkenizi, na Mkadmoni,

²⁰na Mhiti, na Mperizi, na Mrefai,

²¹na Mwamori, na Mkanaani, na Mgirgashi, na Myebusi.