Luka 23

¹Wakasimama mkutano wote, wakampeleka kwa Pilato.

²Wakaanza kumshitaki, wakisema, Tumemwona huyu akipotosha taifa letu, na kuwazuia watu wasimpe Kaisari kodi, akisema kwamba yeye mwenyewe ni Kristo, mfalme.

³Pilato akamwuliza, akisema, Wewe ndiwe mfalme wa Wayahudi? Akajibu akamwambia, Wewe wasema.

⁴Pilato akawaambia wakuu wa makuhani na makutano, Sioni neno lililo ovu katika mtu huyu.

⁵Nao walikaza sana, wakisema, Huwataharakisha watu, akifundisha katika Uyahudi yote, tokea Galilaya mpaka huku.

⁶Pilato aliposikia hayo aliuliza kama huyu ni mtu wa Galilaya.

⁷Na alipopata habari ya kuwa yu chini ya mamlaka ya Herode, alimpeleka kwa Herode, kwa kuwa yeye naye alikuwapo Yerusalemu siku zile.

⁸Na Herode alipomwona Yesu alifurahi sana, kwa sababu alikuwa akitaka sana kumwona tangu siku nyingi, maana amesikia habari zake, akataraji kuona ishara iliyofanywa na yeye.

⁹Akamwuliza maneno mengi, yeye asimjibu lo lote.

¹⁰Wakuu wa makuhani na waandishi wakasimama wakamshitaki kwa nguvu sana.

¹¹Basi Herode akamfanya duni, pamoja na askari zake, akamdhihaki, na kumvika mavazi mazuri; kisha akamrudisha kwa Pilato.

¹²Basi siku ile ile Herode na Pilato walipatana kwa urafiki kwa maana hapo kwanza walikuwa na uadui wao kwa wao.

¹³Na Pilato akawakutanisha wakuu wa makuhani, na wakubwa, na watu,

¹⁴akawaambia, Mtu huyu mmemleta kwangu kana kwamba anapotosha watu; nami, tazama, nimeamua mambo yake mbele yenu, ila sikuona kwake kosa lo lote katika mambo hayo mliyomshitaki;

¹⁵wala hata Herode, kwa maana amemrudisha kwetu; basi tazama, hakuna neno lo lote alilolitenda lipasalo kufa.

¹⁶Kwa hiyo nitamrudi, kisha nitamfungua. [

¹⁷Maana ilimlazimu kuwafungulia mfungwa mmoja wakati wa sikukuu.]

¹⁸Wakapiga kelele wote pamoja, wakisema, Mwondoe huyu, utufungulie Baraba.

¹⁹Naye ni mtu aliyetupwa gerezani kwa ajili ya fitina iliyotokea mjini, na kwa uuaji

²⁰Basi Pilato alisema nao mara ya pili, kwa vile alivyotaka kumfungua Yesu.

²¹Lakini wakapiga kelele, wakisema, Msulibishe. Msulibishe.

²²Akawaambia mara ya tatu, Kwa sababu gani? Huyu ametenda uovu gani? Sikuona kwake hata neno lipasalo kufa. Basi nikiisha kumrudi nitamfungua.

²³Lakini wakatoa sauti zao kwa nguvu sana, wakitaka asulibiwe. Sauti zao zikashinda.

²⁴Pilato akahukumu kwamba haja yao ifanyike.

²⁵Akamfungua yule aliyetupwa gerezani kwa ajili ya fitina na uuaji, yule waliyemtaka, akamtoa Yesu wamfanyie watakavyo.

²⁶Na walipokuwa wakimwondoa walimkamata mtu mmoja, Simoni Mkirene, aliyekuwa ametoka shamba, wakamtwika msalaba, auchukue nyuma yake Yesu.

²⁷Mkutano mkubwa wa watu wakamfuata, na wanawake waliokuwa wakijipiga vifua na kumwombolezea.

²⁸Yesu akawageukia, akasema, Enyi binti za Yerusalemu, msinililie mimi, bali jililieni nafsi zenu na watoto wenu.

²⁹Kwa maana tazama, siku zitakuja watakaposema, Heri walio tasa, na matumbo yasiyozaa, na maziwa yasiyonyonyesha.

³⁰Ndipo watakapoanza kuiambia milima, Tuangukieni, na vilima, Tufunikeni.

³¹Kwa kuwa kama wakitenda mambo haya katika mti mbichi, itakuwaje katika mkavu?

³²Wakapelekwa na wawili wengine, wahalifu, wauawe pamoja naye.

³³Na walipofika mahali paitwapo Fuvu la Kichwa, ndipo walipomsulibisha yeye, na wale wahalifu, mmoja upande wa kuume, na mmoja upande wa kushoto.

³⁴Yesu akasema, Baba, uwasamehe, kwa kuwa hawajui watendalo. Wakagawa mavazi yake, wakipiga kura.

³⁵Watu wakasimama wakitazama. Wale wakuu nao walikuwa wakimfanyia mzaha, wakisema, Aliokoa wengine; na ajiokoe mwenyewe, kama ndiye Kristo wa Mungu, mteule wake.

³⁶Wale askari nao wakamfanyia dhihaka, wakimwendea na kumletea siki,

³⁷huku wakisema, Kama wewe ndiwe mfalme wa Wayahudi, ujiokoe mwenyewe.

³⁸Na juu yake palikuwa na anwani; HUYU NDIYE MFALME WA WAYAHUDI.

³⁹Na mmoja wa wale wahalifu waliotungikwa alimtukana, akisema, Je! Wewe si Kristo? Jiokoe nafsi yako na sisi.

⁴⁰Lakini yule wa pili akamjibu akamkemea, akisema, Wewe humwogopi hata Mungu, nawe u katika hukumu iyo hiyo?

⁴¹Nayo ni haki kwetu sisi, kwa kuwa tunapokea malipo tuliyostahili kwa matendo yetu; bali huyu hakutenda lo lote lisilofaa.

⁴²Kisha akasema, Ee Yesu, nikumbuke utakapoingia katika ufalme wako.

⁴³Yesu akamwambia, Amin, nakuambia, leo hivi utakuwa pamoja nami peponi.

⁴⁴Hapo ilikuwa yapata saa sita, kukawa giza juu ya nchi yote hata saa kenda,

⁴⁵jua limepungua nuru yake; pazia la hekalu likapasuka katikati.

⁴⁶Yesu akalia kwa sauti kuu, akasema, Ee Baba, mikononi mwako naiweka roho yangu.

⁴⁷Alipokwisha kusema hayo alikata roho. Yule akida alipoona yaliyotukia, alimtukuza Mungu, akisema, Hakika yake, mtu huyu alikuwa mwenye haki.

⁴⁸Na makutano yote ya watu waliokuwa wamekutanika kutazama mambo hayo, walipoona yaliyotendeka, wakaenda zao kwao, wakijipiga-piga vifua.

⁴⁹Na wote waliojuana naye, na wale wanawake walioandamana naye toka Galilaya, wakasimama kwa mbali, wakitazama mambo hayo.

⁵⁰Na tazama, akatoka mtu mmoja, jina lake Yusufu, ambaye ni mtu wa baraza, mtu mwema, mwenye haki;

⁵¹(wala hakulikubali shauri na tendo lao), naye ni mtu wa Arimathaya, mji mmoja wa Wayahudi, tena anautazamia ufalme wa Mungu;

⁵²mtu huyo alikwenda kwa Pilato, akataka kupewa mwili wa Yesu.

⁵³Akaushusha, akauzinga sanda ya kitani, akauweka katika kaburi lililochongwa mwambani, ambalo hajalazwa mtu bado ndani yake.

⁵⁴Na siku ile ilikuwa siku ya Maandalio, na sabato ikaanza kuingia.

⁵⁵Na wale wanawake waliokuja naye toka Galilaya walifuata, wakaliona kaburi, na jinsi mwili wake ulivyowekwa.

⁵⁶Wakarudi, wakafanya tayari manukato na marhamu. Na siku ya sabato walistarehe kama ilivyoamriwa.