Zaburi 132

¹Bwana, umkumbukie Daudi Taabu zake zote alizotaabika.

²Ndiye aliyemwapia Bwana, Akaweka nadhiri kwa Shujaa wa Yakobo.

³Sitaingia hemani mwa nyumba yangu, Wala sitapanda matandiko ya kitanda changu;

⁴Sitaacha macho yangu kuwa na usingizi, Wala kope zangu kusinzia;

⁵Hata nitakapompatia Bwana mahali, Na Shujaa wa Yakobo maskani.

⁶Tazama, tulisikia habari zake katika Efrata, Katika konde la Yearimu tuliiona.

⁷Na tuingie katika maskani yake, Tusujudu penye kiti cha kuwekea miguu yake.

⁸Ee Bwana, uinuke, uende kwenye raha yako, Wewe na sanduku la nguvu zako.

⁹Makuhani wako na wavikwe haki, Watauwa wako na washangilie.

¹⁰Kwa ajili ya Daudi, mtumishi wako, Usiurudishe nyuma uso wa masihi

¹¹Bwana amemwapia Daudi neno la kweli, Hatarudi nyuma akalihalifu, Baadhi ya wazao wa mwili wako Nitawaweka katika kiti chako cha enzi.

¹²Wanao wakiyashika maagano yangu, Na shuhuda nitakazowafundisha; Watoto wao nao wataketi Katika kiti chako cha enzi milele.

¹³Kwa kuwa Bwana ameichagua Sayuni, Ameitamani akae ndani yake.

¹⁴Hapo ndipo mahali pangu pa raha milele, Hapo nitakaa kwa maana nimepatamani.

¹⁵Hakika nitavibariki vyakula vyake Wahitaji wake nitawashibisha chakula.

¹⁶Na makuhani wake nitawavika wokovu, Na watauwa wake watashangilia.

¹⁷Hapo nitamchipushia Daudi pembe, Na taa nimemtengenezea masihi wangu.

¹⁸Adui zake nitawavika aibu, Bali juu yake taji yake itasitawi.