Zaburi 144

¹Na ahimidiwe Bwana, mwamba wangu, Anifundishaye mikono yangu vita, Vidole vyangu kupigana.

²Mhisani wangu na boma langu, Ngome yangu na mwokozi wangu, Ngao yangu niliyemkimbilia, Huwatiisha watu wangu chini yangu.

³Ee Bwana, mtu ni kitu gani hata umjue? Na binadamu hata umwangalie?

⁴Binadamu amefanana na ubatili, Siku zake ni kama kivuli kipitacho.

⁵Bwana, uziinamishe mbingu zako, ushuke, Uiguse milima nayo itatoka moshi.

⁶Utupe umeme, uwatawanye, Uipige mishale yako, uwafadhaishe.

⁷Uinyoshe mikono yako toka juu, uniponye, Unitoe katika maji mengi, katika mkono wa wageni.

⁸Vinywa vyao vyasema visivyofaa, Na mkono wao wa kuume ni mkono wa uongo.

⁹Ee Mungu, nitakuimbia wimbo mpya, Kwa kinanda chenye nyuzi kumi nitakuimbia.

¹⁰Awapaye wafalme wokovu, Amwokoa Daudi, mtumishi wake, na upanga wa uovu.

¹¹Uniponye, unitoe, Katika mkono wa wageni. Vinywa vyao vyasema visivyofaa, Na mkono wao wa kuume ni mkono wa uongo.

¹²Wana wetu na wawe kama miche Waliokua ujanani. Binti zetu kama nguzo za pembeni Zilizonakishwa kwa kupamba hekalu.

¹³Ghala zetu na zijae Zenye akiba za jinsi zote. Kondoo zetu na wazae Elfu na makumi elfu mashambani mwetu.

¹⁴Ng'ombe zetu na wachukue mizigo, Kusiwe na kushambuliwa. Wala kusiwe na kuhamishwa, Wala malalamiko katika njia zetu.

¹⁵Heri watu wenye hali hiyo, Heri watu wenye Bwana kuwa Mungu wao.