Zaburi 2

¹Mbona mataifa wanafanya ghasia, Na makabila wanatafakari ubatili?

²Wafalme wa dunia wanajipanga, Na wakuu wanafanya shauri pamoja, Juu ya Bwana, Na juu ya masihi wake.

³Na tuvipasue vifungo vyao, Na kuzitupia mbali nasi kamba zao.

⁴Yeye aketiye mbinguni anacheka, Bwana anawafanyia dhihaka.

⁵Ndipo atakaposema nao kwa hasira yake, Na kuwafadhaisha kwa ghadhabu yake.

⁶Nami nimemweka mfalme wangu Juu ya Sayuni, mlima wangu mtakatifu.

⁷Nitaihubiri amri; Bwana aliniambia, Ndiwe mwanangu, Mimi leo nimekuzaa.

⁸Uniombe, nami nitakupa mataifa kuwa urithi wako, Na miisho ya dunia kuwa milki yako.

⁹Utawaponda kwa fimbo ya chuma, Na kuwavunja kama chombo cha mfinyanzi.

¹⁰Na sasa, enyi wafalme, fanyeni akili, Enyi waamuzi wa dunia, mwadibiwe.

¹¹Mtumikieni Bwana kwa kicho, Shangilieni kwa kutetemeka.

¹²Shikeni yaliyo bora asije akafanya hasira, Nanyi mkapotea njiani, Kwa kuwa hasira yake itawaka upesi, Heri wote wanaomkimbilia.