Zaburi 35

¹Ee Bwana, utete nao wanaoteta nami, Upigane nao wanaopigana nami.

²Uishike ngao na kigao, Usimame unisaidie.

³Uutoe na mkuki uwapinge wanaonifuatia, Uiambie nafsi yangu, Mimi ni wokovu wako.

⁴Waaibishwe, wafedheheshwe, Wanaoitafuta nafsi yangu. Warudishwe nyuma, wafadhaishwe, Wanaonizulia mabaya.

⁵Wawe kama makapi mbele ya upepo, Malaika wa Bwana akiwaangusha chini.

⁶Njia yao na iwe giza na utelezi, Malaika wa Bwana akiwafuatia.

⁷Maana bila sababu wamenifichia wavu, Bila sababu wameichimbia shimo nafsi yangu.

⁸Uharibifu na umpate kwa ghafula, Na wavu aliouficha umnase yeye mwenyewe; Kwa uharibifu aanguke ndani yake.

⁹Na nafsi yangu itamfurahia Bwana, Na kuushangilia wokovu wake.

¹⁰Mifupa yangu yote itasema, Bwana, ni nani aliye kama Wewe? Umponyaye maskini na mtu aliye hodari kumshinda yeye, Naam, maskini na mhitaji na mtu amtekaye.

¹¹Mashahidi wa udhalimu wanasimama, Wananiuliza mambo nisiyoyajua.

¹²Wananilipa mabaya badala ya mema, Hata nafsi yangu ikaingia ukiwa.

¹³Bali mimi, walipougua wao, Nguo yangu ilikuwa gunia. Nalijitesa nafsi yangu kwa kufunga; Maombi yangu yakarejea kifuani mwangu.

¹⁴Nalijifanya kama kwamba ni rafiki au ndugu yangu, Naliinama nikilia kama aliyefiwa na mamaye.

¹⁵Lakini nikijikwaa hufurahi na kukusanyana, Walinikusanyikia watu ovyo nisiowajua, Wananipapura wala hawakomi.

¹⁶Kama wenye mzaha wakikufuru karamuni Wananisagia meno.

¹⁷Bwana, hata lini utatazama? Uiokoe nafsi yangu na maharabu yao, Na mpenzi wangu na wana-simba.

¹⁸Nitakushukuru katika kusanyiko kubwa; Nitakusifu kati ya watu wengi.

¹⁹Walio adui zangu bure wasinisimange, Wanaonichukia bila sababu wasining'ong'e.

²⁰Maana hawasemi maneno ya amani, Na juu ya watulivu wa nchi huwaza hila.

²¹Nao wananifumbulia vinywa vyao, Husema, Ewe! Ewe! Jicho letu limeona.

²²Wewe, Bwana, umeona, usinyamaze; Ee Bwana, usiwe mbali nami.

²³Uamke, uwe macho ili kunipatia hukumu Kwa ajili ya madai yangu, Mungu wangu na Bwana wangu.

²⁴Unihukumu kwa haki yako, Ee Bwana, Mungu wangu, Wala wasinisimangize.

²⁵Wasiseme moyoni, Haya! Ndivyo tutakavyo; Wasiseme, Tumemmeza.

²⁶Waaibishwe, wafedheheshwe pamoja, Wanaoifurahia hali yangu mbaya. Wavikwe aibu na fedheha, Wanaojikuza juu yangu.

²⁷Washangilie na kufurahi, Wapendezwao na haki yangu. Naam, waseme daima, Atukuzwe Bwana, Apendezwaye na amani ya mtumishi wake.

²⁸Na ulimi wangu utanena haki yako, Na sifa zako mchana kutwa.