2 Şamuwel 22

¹Rebbiň Dawudy ähli duşmanlaryndan hem-de Şawuldan halas eden güni, ol Rebbiň şanyna şu aýdymy aýtdy:

²«Reb meniň gaýam, galam hem gutulyşymdyr.

³Hudaýym – gaýam, men Onda howpsyzdyryn. Galkanym hem kuwwatly halasgärim, Galam, Ol meniň gaçybatalgamdyr. Halasgärim meni zulumdan halas edýär!

⁴Öwgä mynasyp Rebbi çagyrdym-da, Duşmanlarymdan halas boldum.

⁵Ölüm tolkunlary daşymy gurşady, Ajal silleri janyma howp saldy.

⁶Ölüler dünýäsiniň tanaplary meni gurşady. Ölüm duzaklary boýnuma pete-pet geldi.

⁷Jebir çekenimde Rebbi – Hudaýymy çagyrdym. Öz ybadathanasynda sesimi eşitdi, Eşitdi Ol ahy-perýadym.

⁸Zemin titräp lerzana geldi, Gögüň diregleri sarsyp çaýkandy, Çaýkandy, çünki Ol gazaba mündi.

⁹Burnundan tüsse çykdy, Agzyndan ýalmap-ýuwudyjy ot, Közler alawlap tutaşdy.

¹⁰Gögi açyp, aşak indi Ol, Aýagynyň asty tüm garaňkylykdy.

¹¹Ol keruba münüp uçdy, Ýeliň ganatlarynda gaýdy.

¹²Tümlügi, gara bulutlary, suw joşgunlaryny Özüne çadyr edindi Ol.

¹³Öňündäki ýalkymyndan Közler alawlap tutaşdy.

¹⁴Reb göklerde güňleç gürledi, Seslendi Beýik Hudaý.

¹⁵Oklaryny atyp, duşmanlaryny dargatdy. Ýyldyrym çakdyryp, olary dyr-pytrak etdi.

¹⁶Rebbiň käýinjinden, Burun deminiň gazabyndan Deňziň düýbi göründi, Açyldy dünýäniň binýady.

¹⁷Ýokardan el uzadyp, meni tutdy, Sogrup çykardy çuň suwlardan.

¹⁸Güýçli duşmanymdan Ol halas etdi, Şeýle-de meni ýigrenýänlerden. Olar menden has güýçlüdiler.

¹⁹Agyr günümde olar garşyma çykdy, Ýöne Reb maňa arkadaýanç boldy.

²⁰Ol meni rahatlyk meýdanyna çykardy, Meni azat etdi, çünki Ol menden göwnühoşdy.

²¹Reb dogruçyllygyma laýyk serpaýymy, Päkligime laýyk sylagymy ýetirdi.

²²Sebäbi men Rebbiň ýoluny tutdum, Erbetlik edip, Hudaýymdan aýrylmadym.

²³Çünki Onuň ähli hökümleri gözümiň alnynda. Onuň parzlaryndan hiç wagt ýüz öwürmedim.

²⁴Onuň huzurynda aýypsyz bolup, Özümi günäden sakladym.

²⁵Reb dogruçyllygyma görä, Öz nazaryndaky päkligime görä sylaglady.

²⁶Wepadar bilen wepadarsyň, Kämilsiň kämil bilen.

²⁷Päk bilen päksiň, Terssiň ters bilen.

²⁸Ähli garyplary halas edersiň, Gedemleri nazaryňda peseldersiň.

²⁹Çünki meniň çyram Sensiň, ýa Reb, Tümlügime Sen şöhle saçýaň, ýa Reb.

³⁰Seniň bilen men goşuna garşy hüjüm ederin, Öz Hudaýym bilen diwardan aşyp bilerin.

³¹Çünki Hudaýyň ýoly kämildir. Reb wadasynyň hakykatdygyny subut edýär. Özüne daýanýanlar üçin galkandyr Ol.

³²Rebden gaýry Hudaý barmy näme?! Hudaýymyzdan belent gaýa barmy näme?!

³³Meniň berk galamdyr Hudaý, Kämil ýola atarýar Ol meni.

³⁴Ol aýagymy keýigiň aýagy ýaly edýändir. Belent ýerlere çykarýar Ol meni.

³⁵Gollarym bürünç ýaýy egip biler ýaly, Ol ellerimi söweşe türgünleýändir.

³⁶Sen maňa gutulyş galkanyňy berdiň, Seniň rehimdarlygyň meni beýgeltdi.

³⁷Giň etdiň ýodalarymy, Aýaklarym büdremedi.

³⁸Şonda duşmanlarymy kowup heläk etdim, Ýer bilen ýegsan edýänçäm, yzyma dönmedim.

³⁹Ýer bilen ýegsan etdim, ýaraladym, Ýerlerinden galmaz etdim, Aýagymyň astynda serildiler.

⁴⁰Çünki maňa söweş kuwwatyny berdiň, Duşmanlarymy aýagymyň astyna saldyň.

⁴¹Ýeňse berer ýaly etdiň olary, Meni ýigrenenleriň külüni göge sowurdym.

⁴²Töweregine garadylar, ýöne datlaryna ýeten bolmady, Rebbi çagyrdylar, ýöne Reb olara jogap bermedi.

⁴³Olary ýeriň tozy ýaly edip ýençdim. Köçedäki palçyk kimin mynjyratdym.

⁴⁴Öz halkymyň garşylygyndan meni halas etdiň, Milletlere baş edip, Sen meni goradyň. Tanamaýan halkym hyzmatymy etdi.

⁴⁵Gelmişekler maňa boýun egýärler, Sesimi eşitdikleri tabyn bolýarlar.

⁴⁶Gelmişekler ysgyndan gaçyp, Titräp, öz berkitmelerinden çykyp gelerler.

⁴⁷Reb diridir! Meniň gaýama alkyş bolsun! Meniň gutulyş gaýam – Hudaý beýgelsin!

⁴⁸Arymy alyp berýän Hudaýdyr Ol, Ol maňa halklary golasty edýär.

⁴⁹Meni duşmanlarymdan halas etdi Ol, Garşydaşlarymdan belende göterdi, Zalymlaryň elinden meni gutardy.

⁵⁰Munuň üçin milletler arasynda Seni alkyşlaryn, ýa Reb! Seniň adyňa alkyşly nagma aýdaryn!

⁵¹Öz patyşaňa uly ýeňişler getirýärsiň Sen! Seçip saýlan Dawudyna, onuň nesline, elmydama sadyk söýgüsini görkezýär.»