Galatýalylara haty 1

¹Adamlar tarapyndan we adamzat arkaly däl-de, eýsem, Isa Mesih we Ony ölülerden direlden Ata Hudaý arkaly resul bolan Pawlus

²we meniň bilen bilelikdäki bütin doganlardan Galatýadaky ýygnaklara salam!

³Atamyz Hudaý, Rebbimiz Isa Mesih size merhemet etsin, parahatlyk bersin.

⁴Atamyz hem Hudaýymyzyň islegine görä, bizi häzirki ýaman çagdan gutarjak bolup, Ol Özüni biziň günälerimiz üçin pida etdi.

⁵Hudaýa ebedilik şöhrat bolsun! Omyn.

⁶Men siziň Mesihiň merhemeti arkaly özüňizi Çagyrany beýle tiz taşlap, başga Hoş Habara öwrülişiňize haýran galýaryn.

⁷Dogrudan-da başga Hoş Habar ýok, ýöne sizi bulaşdyrjak, Mesihiň Hoş Habaryny ýoýjak bolýan käbir adamlar bar.

⁸Emma biz ýa Gökden inen bir perişde hem size wagyz edenimizden başga bir zady Hoş Habar diýip wagyz etse, oňa lagnat bolsun!

⁹Öň aýdyşymyz ýaly, ýene-de aýdýaryn: biri size kabul edeniňizden başga bir zady Hoş Habar diýip wagyz etse, oňa lagnat bolsun!

¹⁰Indi men adamlaryň razyçylygyny gözleýärinmi ýa Hudaýyň razyçylygyny? Ýa-da adamlara ýaranjak bolýarynmy? Men heniz hem adamlara ýaranýan bolsam, Mesihiň guly bolmadygymdyr.

¹¹Eý doganlar, meniň wagyz eden Hoş Habarymyň adamdan däldigini size aýdýaryn.

¹²Çünki men ony bir adamdan alman, bir adamdan öwrenmän, Isa Mesihiň ylhamy arkaly aldym.

¹³Çünki siz meniň ýehudylykda geçen ýaşaýşymy eşidensiňiz. Men Hudaýyň ýygnagyna çendenaşa azar berip, ony weýran etdim.

¹⁴Atalarymyň däp-dessuryna biçak yhlasly bolup, halkymda bolan ýaşdaşlarymyň köpüsinden ýehudylykda ozdum.

¹⁵Emma enemiň garnyndakam, meni seçip, Öz merhemeti bilen çagyran Hudaý,

¹⁶milletler arasynda Ony wagyz eder ýaly, Öz Ogluny mende aýan etmäge razy bolanda, men derrew et we gan bilen maslahatlaşman,

¹⁷Iýerusalime menden öň resul bolanlaryň ýanyna gitmän, Arabystana gitdim, soň hem Şama öwrüldim.

¹⁸Üç ýyldan soň Petrus bilen tanyşmak üçin, Iýerusalime baryp, on bäş gün onuň ýanynda boldum.

¹⁹Ýöne Rebbiň dogany Ýakupdan başga resullaryň hiç birini görmedim.

²⁰Size näme ýazsam, ine Hudaýyň huzurynda ýalan sözlemeýärin.

²¹Onsoň Siriýa we Kilikiýa etrabyna gitdim.

²²Emma Ýahudanyň Mesihdäki ýygnaklary meniň özümi tanaman,

²³diňe: «Bize ozallar azar beren adam indi bir wagtlar özüniň weýran eden imanyny wagyz edýär» diýşip,

²⁴men sebäpli Hudaýy şöhratlandyrýardylar.