Eýýup 10

¹«Durmuşymy ýigrenýärin, Erkinlik bilen arz ederin, Ajy hasratdan geplärin.

²Hudaýa diýerin: „Maňa höküm etme, Meni nämede günäkärleýäniňi aýt“.

³Meni ezmek, Öz eliň işini ret etmek, Pisleriň dildüwşügini goldamak Saňa gowumy?

⁴Sende ynsan gözleri barmy? Ynsanyň görşi dek görýäňmi?

⁵Günleriň ynsanyň günleri ýaly däldir, Ynsanyň ýyllary ýaly däldir ýyllaryň,

⁶Şonda-da etmiş agtarýarsyň, Günä gözleýärsiň menden.

⁷Ýazyksyzdygymy, Eliňden hiç kimiň halas etmejekdigini bilýäň.

⁸Elleriň maňa biçim berdi, meni ýaratdy, Indi bolsa meni heläk etmekçi bolýaň.

⁹Ýadyňa sal! Sen meni toprakdan ýaratdyň, Indi ýene-de topraga öwürjekmi meni?

¹⁰Meni süýt kimin dökmänmidiň? Peýnir kimin gataltmanmydyň?

¹¹Meni süňkler we siňirler bilen birleşdirdiň, Et hem deri bilen örtdüň.

¹²Maňa ýaşaýyş berdiň, merhemet etdiň, Aladaň janymy gorap saklady.

¹³Emma bulary ýüregiňde gizlediň, Hyýalyňda şeýle zatlaryň bardygyny bilýärin.

¹⁴Günä etsem, göz astyňda saklaýarsyň, Etmişimi jezasyz goýmaýarsyň.

¹⁵Günäli bolsam, dat günüme! Bigünä bolsam-da, başymy ýerden galdyryp bilemok, Çünki uýada galan men, agyrdyr derdim.

¹⁶Şir kimin topulýaň galdyrsam başym, Gudratlaryňy maňa garşy ulanýarsyň.

¹⁷Täzeden maňa hüjüm edýärsiň, Maňa bolan gahar-gazabyň möwç alýar, Garşyma goşun üstüne goşun getirýäň.

¹⁸Näme üçin meni ýagty ýalança inderdiň? Wah, hiç kim görmänkä ölen bolsadym.

¹⁹Dünýä inmedik ýaly bolup, Göwreden göni gabra gitsem boljak eken.

²⁰Günlerim gysgadyr, Meni öz günüme goý!

²¹Garaňky, tüm garaňky dünýä, Zulmatdan, tümlükden doly dünýä Ýagtylygy garaňkylyk ýaly bolan diýara gitmezimden öň, Goý, biraz ynjalyk tapaýyn özüme».