Eýýup 12

¹Eýýup şeýle diýdi:

²«Siz bar zady bilýänsiňiz, Siz ölende, paýhas-da siz bilen öler!

³Meniň-de akylym siziňki ýaly, Men-de sizden kem däldirin, Bu zatlary bilmeýän barmy?

⁴Öz dostlaryma gülki boldum! Hudaýy çagyrdym, Ol-da maňa jogap berdi, Dogruçyl, päk bolsam-da, men ile gülki!

⁵Dertsizler betbagtlaryň üstünden gülýärler, Büdreýänleri itip göýberýärler.

⁶Garakçylaryň çadyrlary asuda, Hudaýy gazaplandyrýanlar howpsuz, Olaryň güýji ýeke-täk hudaýydyr.

⁷Haýwanlardan sora, olar saňa öwrederler, Gökdäki guşlardan sora, olar saňa aýdyp bererler.

⁸Ýerden sora, saňa öwreder ol, Deňziň balyklary saňa aýdyp bererler.

⁹Muny Rebbiň eliniň edendigini Bularyň haýsysy bilýän däldir?

¹⁰Her bir jandaryň jany, Bütin adamzadyň demi Onuň elindedir.

¹¹Agzyň tagamy dadyşy deý, Gulagam sözleri seljermezmi?

¹²Paýhas garrylarda, Düşünje uzak ömürdedir.

¹³Paýhasam, gudratam Hudaýdadyr, Öwüt-de, danalyk-da Onuňkydyr.

¹⁴Hudaýyň ýykanyny hiç kim dikeldip bilmez, Onuň gabanyny hiç kim boşadyp bilmez.

¹⁵Hudaý suwlary togtatsa, bar zat guraýar, Iberse-de, dünýäni sil alýar.

¹⁶Gudratam, paýhasam Onuňkydyr, Aldan-da, aldanan-da Onuňkydyr.

¹⁷Ol hökümdarlary kemsidip, Kazylary akmaklara öwürýär.

¹⁸Ol şalaryň guşagyny gowşadyp, Billerine ýüp baglaýar.

¹⁹Ruhanylary kemsidip, Güýçlileri agdarýar.

²⁰Ynamly maslahatçylary dymdyryp, Ýaşululary akylyndan mahrum edýär.

²¹Şazadalary ile ryswa edýär Ol, Güýçlileri ýaragsyzlandyrýar.

²²Garaňkylyk jümmüşiniň syrlaryny açýar, Tüm garaňkylygy ýagtylyga öwürýär.

²³Milletleri beýgeldip, yzysüre ýok edýär, Milletleri artdyryp, olary sürgün edýär.

²⁴Baştutanlary akylyndan azaşdyryp, Ýolsuz çölde ykdyrýan-da Oldur.

²⁵Olar garaňkyda yşyksyz sermeleşip ýörýärler, Olary serhoş kimin entiredýär».