Eýýup 16

¹Eýýup şeýle diýdi:

²«Men bular ýaly zatlary köp eşitdim. Siziň baryňyz dereksiz teselli berijiler!

³Boş sözleriňiz haçan gutarjak? Sizi dawalaşmaga mejbur edýän zat näme?

⁴Siz meniň ýerime bolan bolsadyňyz, Menem siziň ýaly gepläp bilerdim. Size garşy akgynly sözläp, Başymy ýaýkardym.

⁵Sizi öz sözlerim bilen ruhlandyrardym, Köşeşdiriji sözlerim derdiňizi ýeňlederdi.

⁶Geplesem-de derdim ýeňlemeýär, Dymanym bilen janym aram tapmaýar.

⁷Ýa, Hudaý, Sen meni halys tapdan düşürdiň, Bütin hojalygymy weýran etdiň.

⁸Gurpsuzlygym muňa şaýatlyk edýär, Mejalsyzlygym garşyma güwälik edýär.

⁹Hudaý maňa ýigrenç bilen seredip, gaharyna meni parçalaýar, Ol maňa dişlerini gyjaýar, Duşmanymyň gözleri içimden geçýär.

¹⁰Adamlar maňa agyzlaryny öweldip, Meni masgaralap, ýaňagyma urýarlar, Garşyma dil birikdirýärler.

¹¹Hudaý meni näletkerdeleriň, Pisleriň eline berdi.

¹²Rahatlykda ýaşaýardym, emma Hudaý meni sarsdyrdy, Boýnumdan tutup, bölek-bölek etdi, Meni Özüne nyşana edindi.

¹³Onuň kemançylary daşymy gurşaýar, Rehimsizlik bilen böwrümi deşýär, Ödümi ýere dökýär.

¹⁴Bedenimi dilim-dilim edýär, Urşujy kimin üstüme topulýar.

¹⁵Egnime jul tikindim, Başymy toza sokdum.

¹⁶Aglamakdan ýaňa ýüzüm gyzarýar, Gözümi tüm garaňkylyk örtýär.

¹⁷Ýöne men jenaýat etmedim, Dilegim-de päkdir.

¹⁸Eý, toprak, ganymyň üstüni örtme, Perýadym asla diňmesin.

¹⁹Ine, şu pursat şaýadym gökde, Hemaýatkärim ýokarda.

²⁰Dostlarym meni masgaralaýarlar, Hudaýa göz-ýaş edýän.

²¹Adamzat ogly bilen goňşusynyň arasynda bolşy ýaly, Ynsan bilen Hudaýyň arasynda-da bir töwellaçy bolsady!

²²Barsa-gelmeze giderin Birnäçe ýyldan».