Eýýup 18

¹Onsoň şuwaly Bildat şeýle diýdi:

²«Ne zaman gutarjak sözüňi? Oňatja pikirlen, onsoň gepleşeris,

³Biz näme üçin haýwan saýylýarys, Näme üçin akmak görünýäris gözüňe?

⁴Gaharyňa öz janyňa zor salýarsyň, Sen diýip dünýä terk edilsinmi? Gaýalar süýşsünmi?

⁵Pisleriň yşygy sönýär, Ot ýalynlary parlamaýar.

⁶Çadyryndaky nur garaňkylyga öwrülýär, Depelerindäki çyrasy sönýär.

⁷Gadamlarynyň bady gowşaýar, Öz işleri ýykýar olary.

⁸Öz aýaklary bilen tora düşýärler, Özleri garyma ýykylýarlar.

⁹Aýagy gapana düşýär, Olary duzak gapjaýar.

¹⁰Olar üçin ýere syrtmak çekilýär, Ýollaryna duzak gurulýar.

¹¹Çar tarapdan howp abanýar olara, Howp olaryň söbügine düşýär.

¹²Güýç-kuwwat galmaz açlykdan ýaňa, Ýanlaryndan betbagtçylyk aýrylmaz.

¹³Derilerini dert iýýär, Ölüm buşlukçysy el-aýaklaryny ýuwudýar.

¹⁴Ynam eden çadyryndan alnyp gidilip, Howplar şasynyň ýanyna getirilýär.

¹⁵Çadyrlarynda hiç zat galmaz, Ýurtlaryna kükürt ýagdyrylar.

¹⁶Kökleri guraýar aşakda, Şahalary solýar ýokarda.

¹⁷Ýer ýüzünde olaryň atlary unudylar, Köçelerde atlary ýatlanmaz.

¹⁸Ýagtylykdan garaňkylyga itilip, Dünýäden kowlarlar.

¹⁹Halkynyň arasynda ne zürýady, ne-de nebereleri bolar, Mesgeninde yzynda galan bolmaz.

²⁰Öňki nesiller olaryň takdyryna haýran galarlar, Howp gurşaýar soňky nesilleri.

²¹Şeýle bolýandyr erbediň kysmaty, Hudaýy tanamaýanyň mesgeni şudur».