Eýýup 20

¹Onsoň nagamly Sopar şeýle diýdi:

²«Gulak goý! Pikirlerim jogap bermäge mejbur edýär, Mundan artyk saklanyp bilmerin.

³Sözleriň bilen meni kemsidýäň, Düşünjäm saňa jogap berdirýär.

⁴Owaldan bäri, Ynsanyň dünýä gelşinden bäri bilmeýärmidiň muny?

⁵Pisleriň heşellesi wagtlaýyndyr, Hudaýsyzyň şatlygy bir salymlykdyr.

⁶Hatda olaryň boýy göklere ýetip, Başlary bulutlara degse-de,

⁷Pisler öz nejasaty kimin baky ýok bolarlar, Olary tanaýanlar: „Olar nirede?“ diýerler.

⁸Düýş kimin uçup giderler, Gijeki görnüş kimin gaýyp bolarlar.

⁹Bir gören göz gaýdyp görmez olary, Mekany-da olary ikilenç görmez.

¹⁰Ogullary pukaralaryň öňlerinde özlerini kiçelderler, Elleri bilen olaryň baýlygyny yzyna gaýtararlar.

¹¹Bedenleri ýaşlyk gujuryndan doly hem bolsa, Olar bilen toprak astynda ýatarlar.

¹²Hatda pislik agza datly görnüp, Ony diliniň astynda gizleseler-de,

¹³Pisligi saklap, goýbermän, Agyzlarynda saklasalar-da,

¹⁴Iýenleri aşgazanynda turşar, Içlerinde ýylanyň zäherine döner.

¹⁵Baýlygy ýuwdup, ýene gusýarlar ony, Hudaý ony içlerinden çykarýar.

¹⁶Ýylanlaryň zäherini sorarlar, Alahöwreniň dişi olary öldürer.

¹⁷Akar suwlaryň, Baldyr gaýmak akýan dereleriň hözirini görmezler.

¹⁸Gazananlaryny iýmän, yzyna gaýtararlar, Eden söwda-satlygyndan haýyr görmezler.

¹⁹Çünki pukaralary ezip, olardan ýüz öwürdiler, Öz gurmadyk öýlerini eýelediler.

²⁰Açgözlükden kalplary rahatlyk tapmaz, Arzyly zatlary olary halas etmezler.

²¹Iýenlerinden artany bolmady, Munuň üçin rowaçlyklary uzaga çekmez.

²²Bollukda azap çekerler, Depelerinden muşakgat iner.

²³Garynlaryny doýranlarynda, Hudaý lowlaýan gazabyny üstlerine döker, Gazabyny başlaryndan iýmit kimin ýagdyrar.

²⁴Demir ýaragdan gaçyp gutulsalar, Bürünç ýaý içlerinden parran geçer.

²⁵Ok içlerinden böwsüp geçer, Ýalpyldaýan ujy böwürlerinden çykar, Üstlerine howp abanar.

²⁶Tüm garaňkylykda hazynalary ýok bolýar, Üflenmedik ot olary ýuwdar, Çadyrlarynda galanlaryny ýakyp ýok eder.

²⁷Gökler şaýatlyk eder etmişlerine, Bütin älem-jahan olara garşy çykar.

²⁸Hudaýyň gazap güni Öýleri emlägi bilen süpürilip äkidiler.

²⁹Ine, şudur pisleriň Hudaýdan aljak paýy, Hudaýyň olara beren mirasy».