Eýýup 22

¹Teýmanly Elipaz şeýle diýdi:

²«Ynsan Hudaýa ýaramly bolup bilermi? Hatda iň akyldaryň Oňa peýdasy degermi?

³Dogrulygyňdan Gudratygüýçli näme lezzet alýar? Päk durmuşda ýaşaýanyň Hudaýa näme haýry bar?

⁴Hudaýyň seni jezalandyrmasy, höküm etmesi Ondan gorkýandygyň üçinmi?

⁵Pisligiň ummasyz, Etmişleriň tükeniksiz dälmi?

⁶Çünki öz doganyňdan nähak girew aldyň, Eşiklerine çenli sypyryp, olary ýalaňaç goýduň.

⁷Ýadawa içmäge suw bermediň, Açdan çöregiňi gysgandyň.

⁸Ine, güýçliler ülkä eýe bolýandyr, Hormatlanýan onda ýaşaýandyr.

⁹Dul hatynlary yzyna boş goýberdiň, Ýetimleri ezdiň.

¹⁰Munuň üçin daş-töweregiň duzaklar bilen gurşalýar, Duýdansyz gorky seni galagoplyga salýar.

¹¹Hiç zady görüp bilmeziň ýaly, garaňkylyk seni basýar, Sil gelip, seni gark edýär.

¹²Hudaý gökleriň ýokarsynda dälmidir? Ýokardaky ýyldyzlara nazar sal, olar, gör, nähili belentlikde!

¹³Şonuň üçin sen: „Hudaý nämäni bilýär? Ol tüm garaňkylyk içinden höküm edip bilýärmi?

¹⁴Bulutlar Oňa tutudyr, Ol görüp bilmez, Ol gök gümmezinde gezýändir“ diýýäň.

¹⁵Pisleriň ýörän Köne ýoluny tutjakmy?

¹⁶Olar wagtyndan öň ýygnaldylar, Düýplerini suw aldy.

¹⁷Olar Hudaýa: „Bizi öz günümize goý! Gudratygüýçli, sen bize näme edip bilersiň?“ diýdiler.

¹⁸Şonda-da Hudaý öýlerini bereket bilen doldurdy, Pisleriň maslahaty menden uzakda bolsun!

¹⁹Dogruçyl adam muny görüp begenýär, Bigünä pisleriň üstünden gülýär.

²⁰Olar: „Ýagylarymyz ýok edildi, Galan zatlary ýanyp kül boldy“ diýýärler.

²¹Hudaý bilen dost bol, rahatlykda bol, Şonda haýyr taparsyň.

²²Gulak goý Onuň agzyndan çykýan öwüt-ündewe, Sözlerini ýüregiňde sakla.

²³Gudratygüýçlä tarap öwrülseň, öňki halyňa gowşarsyň, Etmişi çadyryňdan uzaklaşdyrsaň,

²⁴Altyny topraga, Opyr tyllasyny jülgedäki daşlaryň arasyna atsaň,

²⁵Gudratygüýçlini öz altynyň, Gymmat bahaly kümşüň saýsaň,

²⁶Ine, şonda Gudratygüýçliden göwnühoş bolarsyň, Hudaýa ýüz tutarsyň.

²⁷Hudaýdan dileg edersiň, Ol hem seni eşider, Sen hudaýýolularyňy berersiň.

²⁸Ol diýen zadyňy ýerine ýetirer, Ýollaryňa nur çaýylar.

²⁹Beýlekiler kemsidilende: „Ýeriňden gal“ diýýäň, Çünki Hudaý pes göwünlileri halas edýär.

³⁰Hudaý hatda ýazyklylary-da halas eder, Olar seniň elleriň tämizligi üçin gutularlar».