Eýýup 36

¹Elihu sözüni dowam edip, şeýle diýdi:

²«Biraz sabyr et, men saňa düşündireýin, Hudaý üçin aýtmaly sözüm bar.

³Bilimimi dürli çeşmelerden toplap, Ýaradanymyň adyldygyny subut ederin.

⁴Dogrudanam, sözlerim ýalan däl, Garşyňda duran bilimde kämildir.

⁵Elbetde, Hudaý gudratly, Hiç kimi kemsitmeýär Ol, Ol paýhasda gudratlydyr.

⁶Pisleri diri goýmaz Ol, Ezilenlere adalatlylyk berýär.

⁷Dogrulardan gözüni aýyrmaz, Olary şalar bilen tagtda oturdyp, Ebedilik mertebelerini beýgeldýär.

⁸Dogruçyllar zynjyr bilen baglanyp, Azap duzagyna düşürilen bolsalar,

⁹Hudaý gödek işlerini, ýazyklaryny Olara aýan etmegi üçindir.

¹⁰Öwüt-ündewini diňledip, Pislikden dönmekligi buýurýar.

¹¹Olar Hudaýa gulak salyp, Oňa hyzmat etseler, Günlerini hoşwagtlykda, Ýyllaryny şady-horramlykda geçirerler.

¹²Gulak asmasalar, gylyçdan heläk bolarlar, Dünýäden pähim-paýhassyz ötüp giderler.

¹³Hudaýsyzlar gahar-gazaby içinde saklaýarlar, Hudaý olary jezalandyrsa-da, Ondan ýardam dilemeýärler.

¹⁴Ýaşlykda ölüp gidýärler, Ömürleri azgynlykda gutarýar.

¹⁵Hudaý ezilenleri azaplaryndan gutarýar, Muşakgatlylara Özüni eşitdirýär.

¹⁶Ol seni hem dertden azat edip, Çäksiz giňişlige çykardy, Saçagyňy näzi-nygmatlardan doldurdy.

¹⁷Indi sen pislere hak bolan jezany çekýäň, Hökümden we adalatdan gutulyp bilmersiň.

¹⁸Sak bol, baýlyk bilen aldanaýma, Para gyzygyp, ýoldan çykaýma.

¹⁹Baýlygyň, egsilmez güýç-gaýratyň, Seni dertden gutaryp bilermi?

²⁰Halklaryň ýer ýüzünden Ýok ediljek gijesini arzuw etme.

²¹Seresap bol! Pislikden ýüz öwür, Seni günäden saklamak üçin muşakgatlyk iberildi.

²²Hudaýyň gudraty beýikdir, Onuň ýaly tälim berýän barmydyr?

²³Hudaýa näme etmelidigini öwreden kim? Kim Oňa: „Edeniň telek“ diýip bilýär?

²⁴Hudaýyň işlerini öwmegi unutma, Ynsanlar bu hakda aýdym aýtdylar.

²⁵Bütin ynsanlar Hudaýyň işlerini gördi, Her kes oňa uzakdan seredýär.

²⁶Hudaý, hakykatdanam, beýikdir, Onuň beýikligine doly düşünip bilmeýäris, Onuň ömür ýyllary akyla sygmaz.

²⁷Hudaý suw damjalaryny göge ýygnap, Ýagyş damjalaryna öwürýär.

²⁸Bulutlardan ýagyş ýagýar, Ynsanlaryň üstünden bol ýagmyr ýagdyrýar.

²⁹Bulutlaryň ýaýradylyşyna, Asmanyň gübürdisine düşünip bilýän barmy?

³⁰Hudaý gökde ýyldyrym çakdyrýar, Deňizleriň düýbüne çenli örtýär.

³¹Hudaý halky şeýle dolandyrýar, Olary bolelin iýmit bilen üpjün edýär.

³²Ýyldyrymy Öz elinde saklap, Öz bellän ýerinde çakmagy buýurýar.

³³Gök gümmürdisi apy-tupanyň ýetip gelýändigini duýdurýar, Hatda mal-gara apy-tupanyň ýetip gelýänini bildirýär».