Eýýup 41

¹«Ony tutmak umydy netijesizdir, Garasyny göreniň gorkudan ýüregi ýarylar.

²Ony oýaryp biljek ýürekli adam ýokdur, Kim Meniň öňümde durup biljek?

³Kim Menden hasabat bermegimi soraýar? Gögüň astyndaky bar zat Meniňkidir.

⁴Liwýatanyň beden agzalary, Beýik güýji we gözel syraty barada dymmaryn.

⁵Kim onuň sowudyny çykaryp biler? Kim oňa ýarag bilen golaýlaşyp biler?

⁶Kim onuň agzyny açmaga ýürek eder? Agzyndaky dişleri gorkunçdyr.

⁷Arkasy ykjam möhür bilen mäkämlenen, Hatar-hatar galkanlar bilen örtülen.

⁸Olar biri-birlerine şeýle ýakyn welin, Hatda aralaryndan howa geçmeýär.

⁹Birek-bireklerine ýapyşdyrylgydyr olar, Mäkäm seplenendirler, olary aýryp bolmaz.

¹⁰Asgyranda ot saçýar, Gözleri daň şapagy kimin ýanyp dur.

¹¹Agzyndan ýalyn çykýar, Ot uçgunlary syçraýar.

¹²Burnunyň deşiklerinden gaýnaýan gazan, Ýanýan gamyş kimin tüsse çykýar.

¹³Demi kömürleri köredýär, Agzyndan alaw çykýar.

¹⁴Güýç onuň boýnundadyr, Gorky onuň huzurynda tans edýär.

¹⁵Etiniň gatlary biri-birine ýapyşyp, Endamynda berkän, ol gymyldamaýar.

¹⁶Ýüregi daş kimin gaty, Degirmen daşy kimin gatydyr.

¹⁷Ol ýerinden galanda, güýçliler lerzana gelýär, Gorkudan ýaňa titräp, özlerini ýitirýärler.

¹⁸Oňa gylyç kär etmez, Naýza, hanjar we ok ötmez.

¹⁹Ol demri saman, Bürünji çüýrük agaç saýýar.

²⁰Atylan okdan gaçmaz, Sapan daşlary oňa saman ownugy kimindir.

²¹Serdesseleri saman saýýar, Özüne tarap zyňylan naýzalara gülýär.

²²Garnynyň asty gyýçak küýze döwükleri kimindir, Palçygyň üstüne süýnüp, mala basylan ýaly yz galdyrýar.

²³Çuňlugyň suwlaryny gazan kimin gaýnadýar, Deňzi melhem gaýnadylýan gaba dönderýär,

²⁴Yzynda parlak yz galdyrýar, Deňiz agaran saça meňzedilýär.

²⁵Bütin älemde onuň deňi-taýy ýokdur, Bu mahluk gorky-ürkini bilýän däldir.

²⁶Ol ähli jandarlaryň içinde iň tekepbiridir, Ýyrtyjy haýwanlaryň iň boýnyýogynydyr».