Ýermeýanyň agysy 3

¹Hudaýyň gazap taýagyndan hasrat çeken adam men. א

²Ol meni idip, yşyksyz tüm garaňkylyga getirdi. א

³Ol bütin gün gaýta-gaýta garşyma elini galdyrdy. ב

⁴Etimi, hamymy çüýretdi, süňklerimi döwüp taşlady. ב

⁵Üstüme çozup, daşymy gabady, başyma hasrat hem dert saldy. ב

⁶Bireýýäm ölenler kimin meni garaňkylykda ýaşatdy. ג

⁷Gaçmaz ýaly daşyma diwar aýlady, boýnuma agyr zynjyrlar saldy. ג

⁸Perýat edip, kömege çagyranymda, Ol dilegime gulak salmady. ג

⁹Ýonma daşlar bilen ýolumy ýapdy, ýodalarymy egreltdi. ד

¹⁰Hudaý meni peýleýän aýydyr, bukuda ýatan arslandyr. ד

¹¹Ýolumdan azaşdyryp parçalady, halys sandan çykardy. ד

¹²Ol ýaýyny çekdi, meni okuna nyşan edindi. ה

¹³Sagdagyndaky oklary atyp, bagrymy deşdi. ה

¹⁴Men ähli halkyma gülki boldum, günuzyn olaryň aýdymy boldum. ה

¹⁵Ol meni hasratdan doýrup, ýowşanyň ajy suwuny içirdi. ו

¹⁶Çagyl bilen dişlerimi owratdy, kül içinde depip, dyza çökdürdi. ו

¹⁷Meniň janym rahatlygy unutdy, şatlygyň nämedigi ýatdan çykdy. ו

¹⁸Özüme diýdim: «Jandan el üzdüm, Rebbe bolan ähli umydym öçdi». ז

¹⁹Hasratymdyr sergezdanlygym hakda oýlansam, ajy ýowşan bilen zäher-zakgun içen ýalydyr! ז

²⁰Janym muny dyngysyz ýatlaýar, şonuň üçin ýüregim paralanýar. ז

²¹Emma şuny ýatda saklaýan, şonda ýene-de umyt döreýär: ח

²²Rebbiň wepaly söýgüsi tükenmezdir, çünki Onuň rehimdarlygy bakydyr. ח

²³Her säher bular täzelenýär, Seniň wepadarlygyň beýikdir! ח

²⁴Janym diýýär: «Reb meniň paýymdyr. Şoňa görä Oňa intizardyryn». ט

²⁵Reb Özüne bil baglaýanlara, Özüni ýürekden agtarýanlara gowudyr. ט

²⁶Rebbiň halas edişine ümsüm garaşmak gowudyr. ט

²⁷Adama boýuntyrygy ýaşlykdan götermek gowudyr. י

²⁸Ynsan dymyp, ýalňyz otursyn, çünki boýuntyrygy dakan Rebdir. י

²⁹Ýere ýüzin ýykylsyn, belki, umyt bardyr. י

³⁰Özüni urana ýaňagyny tutsun, masgaralanmakdan doly bolsun. כ

³¹Çünki Taňry hiç wagt ömürlik terk etmez. כ

³²Ol birine hasrat çekdirse-de, bol merhemetine görä rehim-de eder. כ

³³Hasrat berip, gaýga batyrsa-da, bulary Ol ýürekden etmez. ל

³⁴Ýurduň ähli ýesirleri aýak astynda depelenende, ל

³⁵Beýik Hudaýyň huzurynda ynsan hukuklary kemsidilende, ל

³⁶dawada birine adalatsyzlyk edilen wagty, Taňry olary görýän dälmidir? מ

³⁷Bulary Taňrynyň Özi buýurmasa, kim buýruk berip ýerine ýetirderdi? מ

³⁸Ýagşylyk hem, ýamanlyk hem Beýik Hudaýyň agzyndan çykmaýarmy? מ

³⁹Öz günäleri üçin jezasyn alsa, diri galan adam näme üçin zeýrensin? נ

⁴⁰Geliň, ýollarymyzy synap göreliň, täzeden Rebbe gaýdyp baralyň. נ

⁴¹Geliň, gökdäki Hudaýa elimizi-de, ýüregimizi-de açalyň. נ

⁴²Biz günä edip baş galdyrdyk, Sen bizi bagyşlamadyň. ס

⁴³Kowaladyň bizi gazap bilen, rehimsizlik bilen öldürdiň. ס

⁴⁴Özüňi buluda bürediň, dilegler eşidilmesin diýip. ס

⁴⁵Bizi milletler arasynda syr-süplüge, zir-zibile öwürdiň. פ

⁴⁶Ähli duşmanlarymyz bizi ýaňsyladylar. פ

⁴⁷Üstümize howp we hile, harabaçylyk we weýrançylyk abandy. פ

⁴⁸Eziz halkymyň heläkçiliginden ýaňa gözýaşlarym sil bolup akýar. ע

⁴⁹–50 Reb gökden aşak nazar salýança, gözýaşlarym hiç tükenmez, asla kepemez. ע

⁵¹Şäherimdäki gyzlaryň halyna ýüregim gyýym-gyýymdyr. צ

⁵²Maňa nähak duşman bolanlar meni guş kimin awlap tutdular. צ

⁵³Diriligime çukura taşlap, üstümden daş okladylar. צ

⁵⁴Suwlar depämden aşdy, «Men heläk boldum» diýdim. ק

⁵⁵Çukuryň düýbünden Seni çagyrdym, ýa Reb. ק

⁵⁶«Gulagyňy dykma, perýadyma gulak goý» diýen sözlerimi eşitdiň. ק

⁵⁷Seni çagyranymda, ýanyma gelip: «Gorkma!» diýdiň. ר

⁵⁸Eý, Taňry, janymy gutaran Sensiň, ömrümi halas eden Sensiň. ר

⁵⁹Ýa Reb, maňa edilen adalatsyzlygy gördüň, meniň hakymy alyp ber. ר

⁶⁰Menden nähili öç alyşlaryny gördüň, garşyma guran dildüwşüklerini bildiň. ש

⁶¹Ýa Reb, olaryň masgaralaýşyny eşitdiň, garşyma guran dildüwşüklerini gördüň. ש

⁶²Duşmanlarymyň bütin gün meniň garşyma edýän hyşy-wyşylaryny we hüňürdilerini eşitdiň. ש

⁶³Ertirden agşama çenli men olaryň ýaňsy aýdymy boldum. ת

⁶⁴Olaryň elleri bilen edenlerini eginleri bilen çekdir, ýa Reb! ת

⁶⁵Ýüreklerine howsala sal. Goý, näletiň olaryň üstünden insin! ת

⁶⁶Gazap bilen kowalap, gökleriň astyndan olary ýok et, ýa Reb!