Süleýmanyň pähimleri 15

¹Mylaýym jogap gahary sowýar, gaty söz gazaby joşdurýar.

²Danalygyň dilinden bilim ýaýraýar, akmagyň agzyndan akmaklyk çykýar.

³Rebbiň gözi hemme ýerdedir, ýamana-ýagşa bakýandyr.

⁴Mylaýym dil ýaşaýyş daragtydyr, bozuk dil ruhy çökerýär.

⁵Akmak atasynyň öwüdini ret edýändir, terbiýä gulak asýan bolsa seresaplydyr.

⁶Dogrynyň öýünde baýlyk köpdür, ýamanyň gazanjynda muşakgat bardyr.

⁷Dananyň dili bilim ýaýradýar, akmagyň aňy beýle däldir.

⁸Ýamanlaryň gurbanlygy Rebbe ýigrenjidir, dogruçyllaryň dogasy-da Onuň guwanjydyr.

⁹Ýaramazlaryň ýoly Rebbe ýigrenjidir, dogruçyllygy yzlaýany bolsa Ol halaýandyr.

¹⁰Dogry ýoly terk edýän berk jeza alar, terbiýäni ýigrenýän ölüme barar.

¹¹Ölüler dünýäsi we heläkçilik ýeri Rebbe açyk bolsa, ynsan ýüregi Oňa has hem aýandyr.

¹²Masgaralaýjy adam käýinji halaýan däldir, ol akyldaryň ýanyna hem gitmez.

¹³Ýürek şatlygy ýüzi ýagtyldýar, ýürek yzasy ruhy syndyrýar.

¹⁴Düşünjeli adamyň ýüregi bilim agtarýandyr, akmaklaryň agzy bolsa akmaklykdan ganýandyr.

¹⁵Garyplaryň hemme güni muşakgat, ýöne ýagşy ýürek mydamalyk meýlisdir.

¹⁶Köp baýlyk bilen kynçylykda ýaşanyňdan, az baýlyk bilen Rebden gorkup ýaşamak ýagşydyr.

¹⁷Ýigrenç bilen iýlen göle etinden, söýgi bilen iýlen bulamak gowudyr.

¹⁸Gaharjaň dawa turuzýandyr, giň göwünli bolsa jenjeli ýatyrýandyr.

¹⁹Ýaltanyň ýoly tikenli aýmança meňzeýär, dogruçylyň ýoly bolsa düzdür.

²⁰Akylly ogul atasyny guwandyrýar, akmak ogul bolsa enesini ýigrenýär.

²¹Akmaklyk kemakyllara şatlykdyr, düşünjeliler bolsa dogry ýöreýär.

²²Maslahat bolmasa maksatlar puçdur, maslahatçy köp bolanda myrat hasyl bolýar.

²³Ynsana şatlyk gowy jogapdan gelýändir, ýerlikli söz adama şatlyk getirýändir.

²⁴Akyldara ýokardaky durmuş ýolundan ýöremegi aşakdaky Ölüler dünýäsinden daşlaşmagy üçindir.

²⁵Reb tekepbirleriň öýüni ýykýandyr, dul hatynyň çägini bolsa goraýandyr.

²⁶Ýaman niýet Rebbe ýigrenjidir, ýakymly sözleri bolsa tämiz saýýar.

²⁷Nebsine çapýan öýüne alada getirýär, parany ýigrenýän bolsa uzak ýaşaýar.

²⁸Dogruçylyň aňy jogap berende oýlanýandyr, ýaramazlaryň agzy ýamanlygy sowurýandyr.

²⁹Reb ýaramazlardan daşdadyr, dogruçyllaryň dogasyny bolsa eşidýär.

³⁰Gözüň nury ýüregi begendirýär, hoş habar bolsa süňküňe kuwwat berýär.

³¹Ýaşaýyş öwüdini diňleýän gulak parasatlylar arasynda mesgen tutar.

³²Öwüt-nesihaty tutmaýan öz janyny ýigrenýändir, öwüdi diňleýän bolsa düşünje gazanýar.

³³Rebden gorkmaklyk danalygy öwredýändir, hormat pes göwünlilikden soň gelýändir. ‎