Süleýmanyň pähimleri 17

¹Rahatlykdaky bir döwüm gury nan dawadan doly jaýdaky meýlisden gowudyr.

²Masgara ogluň üstünden paýhasly gul höküm sürer we doganlar hatarynda mirasa şärik bolar.

³Kümüş göweçde, altyn kürede synalýan bolsa, ýürekleri barlaýan Rebdir.

⁴Ýamanlyk edýän erbet dodaklara üns berýändir, ýalançy ýaman niýetli dile gulak asýandyr.

⁵Garyby ýaňsylaýan Ýaradany kemsidýändir, betbagtlyga şatlanýan bolsa jezasyz galmaz.

⁶Agtyklar garry adamlaryň täjidir, ogullaryň şan-şöhraty bolsa ene-atalarydyr.

⁷Dürdäne söz akmaga ýaraşmasa, aldawly söz hem asylzada hiç gelişmeýär.

⁸Para ony berýäniň gözüne bir tumar kimindir, ol nirä öwrülse, üstünlik getirer.

⁹Ýazygy geçýäni söýgi höweslendirýändir, dawa-jenjeli gaýtalaýan bolsa dostuny ýitirýär.

¹⁰Düşünjeli adama bir käýinç akmaga urlan ýüz kötekden agyrdyr.

¹¹Ýamanlar diňe bulagaýlyk turuzýandyr, olara garşy bolsa zalym çapar gönderiler.

¹²Akmagyň akylsyzlygyna duş bolanyňdan, çagasyny aldyran aýa duş gelmek gowudyr.

¹³Ýagşylyga ýamanlyk gaýtarýanyň öýünden ýamanlyk gitmez.

¹⁴Dawa-jenjeliň başy böwsülen böwet ýalydyr, şonuň üçin ony tutaşmanka bes et.

¹⁵Ýaramazy aklaýan bilen dogruçyl adamy ýazgarýanyň ikisini-de Reb ýigrenýändir.

¹⁶Näme üçin akmagyň elinde danalyk almaga pul bolsun? Onda öwrenmek niýeti ýok.

¹⁷Ýakynyň seni hemme wagt söýýändir, dogan kynçylykly pursatyň üçin doglandyr.

¹⁸Düşünjesi kemlik edýän kemakyl ýakynynyň deregine el berip kepil bolýandyr.

¹⁹Ýazygy söýýän dawany söýýändir, kim bosagasyny belent gursa, süňküniň döwülmegine garaşýandyr.

²⁰Egri ýürek ýagşylyk tapmaýar, egri dil bolsa, kynçylyga düşýär.

²¹Akmagyň atasy hasrat çeker, akylsyzyň atasy şatlygy bilmez.

²²Şadyýan ýürek oňat şypadyr, synyk ruh süýegiňi guradýandyr.

²³Adalat ýodalaryny ýoýmak üçin, ýaramaz adam gizlin para alýandyr.

²⁴Düşünjeli adam danalyga seredýändir, akmagyň nazary ýeriň aňry çetine.

²⁵Akmak ogul atasyna hasrat, dograna dertdir.

²⁶Ýazyksyza jerime salmak nädürsdir, asylzada-da dogruçyllygy üçin jeza bermek dürs däldir.

²⁷Sözüni jylawlaýan bilimlidir, düşünjeli adam bolsa mylaýym ruhludyr.

²⁸Akmak hem dymanda akylly, agzyny ýumanda, düşünjeli saýylýandyr. ‎