Süleýmanyň pähimleri 25

¹Bular hem Süleýmanyň pähimleridir. Olary Ýahuda patyşasy Hizkiýanyň emeldarlary göçürip alypdyrlar.

²Ýaşyryn iş Hudaýyň şöhratydyr, işi derňemek bolsa patyşanyň şöhratydyr.

³Asman belent, ýeriň aşagy çuň; patyşanyň ýüregi hem şeýledir, ony derňäp bolýan däldir.

⁴Kümüşden hapany aýyr, zergäre bir gap bolar.

⁵Ýaramaz adamy patyşanyň huzuryndan aýyr, şonda tagt dogruçyllyk bilen berkarar bolar.

⁶Patyşanyň huzurynda özüňi ýokary tutma, beýikleriň ornunda durma.

⁷Çünki asylzadalaryň öňünde kiçelmegiňden, emeldaryň saňa: «Töre geç» diýmegi gowudyr. Gözüň gören zadyny

⁸derrew kaza getirme. Soňra ýakynyň seni utandyranda näme edersiň?

⁹Dawany ýakynyň özi bilen et, başganyň syryny paş etme.

¹⁰Ýogsa eşiden adam seni uýada goýar, hemişe ýaman atly bolarsyň.

¹¹Ýerinde aýdylan söz kümüş mejimäniň içinde goýlan altyn alma ýalydyr.

¹²Diňleýän gulaga akyldaryň käýinji tylla ysyrga we altyn bezeg ýalydyr.

¹³Sadyk ilçi özüni iberenler üçin, orak wagtynda garyň salkynlygy ýalydyr. Ol öz hojaýynynyň nepesini janlandyrar.

¹⁴Berilmedik sowgat bilen öwünýän adam ýagmyrsyz bulut we boş ýel ýalydyr.

¹⁵Hökümdar sabyr bilen yrylýandyr, mylaýym söz iň kütegiň hem aňyna ýetýändir.

¹⁶Bal tapdyňmy? Ýeterlik iý, aşa düşüp gusaýma.

¹⁷Ýakynyň öýüne ýygy-ýygy barmakdan aýagyňy kes, senden irip, seni ýigrenäýmesin.

¹⁸Ýakynyna garşy ýalan şaýatlyk edýän adam gürzüdir, gylyçdyr, ýiti okdur.

¹⁹Aladaly günde wepasyz adama ynanmak, çüýrük dişe we maýyp aýaga ynanan ýalydyr.

²⁰Gamly ýürege aýdym aýtmak sowuk howada geýim çykarmak we ýara sirke guýmak ýalydyr.

²¹Eger duşmanyň aç bolsa, oňa nan ber, suwsan bolsa suw ber.

²²Şonda onuň başyna köz goýarsyň, Reb seni sylaglar.

²³Demirgazyk ýeli ýagyş getirýändir, gybatkeş dil ýüzleri gaharly edýändir.

²⁴Igenjeň aýal bilen öýde ýaşandan, üçegiň bir burçunda ýaşamak gowudyr.

²⁵Uzak ýurtdan gelen hoş habar teşne bokurdaga sowuk suw ýalydyr.

²⁶Ýaramazlaryň öňünde ýan beren dogruçyl adam bulandyrylan çeşme, hapalanan bulak mysalydyr.

²⁷Baly köp iýmek ýagşy däldir, şöhratparazlykdan şöhrat gözlemek gowy däldir.

²⁸Özüne buýrup bilmeýän kişi diwardyr galasy ýykylan şäher kimindir. ‎