Süleýmanyň pähimleri 28

¹Ýaramaz adam hiç kim kowalamasa-da gaçýandyr, dogruçyl bolsa arslan kimin batyrdyr.

²Ýurt gozgalaň etse, serdary köpelýändir, aň-düşünjeli adam arkaly bolsa, abadanlyk dowam edýändir.

³Ejizleri ezýän garyp hasyly süpürip äkidýän çabga ýalydyr.

⁴Kanuny bozýanlar ýaramazlary öwýändir, kanuny saklaýanlar bolsa olar bilen göreşýändir.

⁵Ýaman adamlar adalata düşünýän däldir, Rebbi agtarýanlar bolsa oňa doly düşünýändir.

⁶Sadyk ýolda gezýän garyp egri ýoldan ýöreýän baýdan ýagşydyr.

⁷Düşünjeli ogul kanuny saklaýar, horanlar bilen ýoldaş bolan atasyna ysnat getirer.

⁸Peýda we göterim bilen baýlygyny artdyrýan ony garyplara sahawat edýän adam üçin ýygnaýandyr.

⁹Kim kanuny diňlemezlik üçin gulagyny dykýan bolsa, onuň Hudaýdan dilegi-de ýigrenjidir.

¹⁰Kim dogruçyllary ýaman ýola çekýän bolsa, öz gazan gorpuna özi ýykylar. Sadyklar bolsa ýagşy miras alarlar.

¹¹Baý öz gözüne akyllydyr, düşünjeli garyp bolsa ony synlap tanaýandyr.

¹²Dogrular üstün çykanda, uly dabara bolýandyr, emma erbetler güýje eýe bolsa, adamlar bukulýandyr.

¹³Ýazyklaryny ýaşyran üstünlik gazanmaz, olary boýun alyp terk etse, merhemet tapar.

¹⁴Mydama Rebden gorkýan adam nähili bagtly! Ýüregini gataldýanlar bolsa bela uçraýar.

¹⁵Ejiz halkyň ýaramaz hökümdary arlaýan arslan, topulýan aýy ýalydyr.

¹⁶Düşünjesiz hökümdar juda zalymdyr, adalatsyz gazanjy ýigrenýän bolsa ömrüni uzaldýandyr.

¹⁷Biriniň ganyna galan adam gabra çenli gaçar, ony hiç kim goldamasyn.

¹⁸Sadyk gezýänler halas bolar, egri ýolly adamlar bolsa duýdansyz ýykylar.

¹⁹Öz ýerini bejerýäniň nany bol bolar, boş işlere kowalaşýan garyplykdan bol bolar.

²⁰Sadyk adamyň ýalkawy köp bolar, baýlygyň yzynda hars urýan bolsa jezasyz galmaz.

²¹Tarapgöý bolmak ýagşy däldir, bir döwüm nan diýip ynsan ýazykly bolar.

²²Gysganç adam baýlygyň yzynda hars urup, başyna garyplygyň geljegini bilýän däldir.

²³Dili bilen ýaranjaňlyk edýänden, birine käýeýän köp göwün awlar.

²⁴Ata-enesini talap, ýene «Bu ýazyk däldir» diýýän garakçynyň şärigidir.

²⁵Açgöz adam jenjelçidir, Rebbe bil baglaýan bolsa doklukda ýaşar.

²⁶Özüne ynanýan akmakdyr, parasatly gezýän bolsa gutular.

²⁷Ýoksula ýardam edýän mätäç bolmaz, görmezlige salýan bolsa, näletsiz galmaz.

²⁸Erbetler güýje eýe bolanda, adamlar bukulýandyr, olar heläk bolanda bolsa, dogruçyllar güýçlenýändir. ‎