Süleýmanyň pähimleri 6

¹Oglum, karz aljaga kepil geçip, oňa derek el beren bolsaň,

²Öz diliňden duzaga düşensiň, öz sözleriň bilen tutulansyň.

³Ondan halas bolmak üçin şeýle etmeli, oglum. Ýakynyň penjesine düşeniňe görä, bar-da, onuň öňünde özüňi kiçelt. Ýalbar.

⁴Gözüňe uky berme, gabagyňy ýumma.

⁵Awçydan gaçan jeren kimin, Guşbazyň elinden sypan guş kimin özüňi gutar.

⁶Eý, ýalta, garynjanyň ýanyna bar; olaryň işleýşine seret-de, akyl al!

⁷Olaryň ne baştutany, ne gözegçisi, ne-de hökümdary bar.

⁸Tomusda öz iýmitini toplaýarlar, orakda öz azygyny ýygnaýarlar.

⁹Eý, ýalta kişi, sen haçana çenli ýatjak? Ukudan haçan oýanjak?

¹⁰Birazajyk uklamak, biraz irkilmek üçin, gyşaryp gol gowşuranyňda, garyplyk garakçy ýaly, mätäçlik ýaragly adam mysaly başyňdan iner.

¹²Deýýus bilen ýamanyň ýalan ýaşaýar agzynda.

¹³Ol gözlerini gypýar, aýaklary bilen yşarat edýär, barmagy bilen ümleýär.

¹⁴Ýüreginde mekir niýet bar, mydama dawa-jenjel turuzýar.

¹⁵Şonuň üçin oňa betbagtçylyk duýdansyz iner; pagyş-para bolar, şypa tapylmaz.

¹⁶Reb alty zady, dogrusy, ýedi zady ýigrenýändir.

¹⁷Tekepbir göz, ýalançy dil, bigünä gan dökýän el.

¹⁸Ýaman niýetli ýürek, ýamanlyga ýortýan aýaklar,

¹⁹Ýalan ýagdyrýan galp şaýat, doganlar arasynda dawa döredýän adam.

²⁰Oglum, ataň buýrugyny berjaý et, eneň öwütlerinden ýüz öwürme.

²¹Olary mydam ýüregiňde sakla, boýnuňa bagla.

²²Ýolbelet bolarlar saňa ýörän mahalyň; gorarlar seni ýatan mahalyň; gürrüňdeş bolarlar oýa wagtyňda.

²³Ýaman aýaldan, süýji dilli zynahor aýaldan goramak üçin, buýruk – çyra, öwüt – nurdur. Käýinç-terbiýe – ýaşaýşa ýoldur.

²⁵Onuň gözelligine ýüregiňden höwes etme, kirpikleriniň ýesiri bolma.

²⁶Lolynyň bahasy bir döwüm çörege dursa-da, bu kemçin gymmatly jany awlaýandyr.

²⁷Kim eteginde ot göterer-de, eşigini ýakmaz?

²⁸Kim közüň üstünden ýörär-de, dabany köýmez?

²⁹Ýakynynyň aýalynyň ýanyna giren hem şeýle bolýar; oňa el degren jezasyz galmaz.

³⁰Açka garnyny doýurmak üçin ogurlan ogryny ýigrenýän däldirler ahyryn?

³¹Ýöne ol tutulsa, ýedi esse edip gaýtarar; öýüniň bar baýlygyny bermeli bolar.

³²Zyna edýän adam kemakyldyr; ol öz janyny heläk edýär.

³³Ol tenine ýara alar, biabraýçylyga uçrar, päklenip bolmajak uýada galar.

³⁴Çünki gabanjaňlyk erkek kişini gazaplandyrýar, ol öç alanda, hiç rehim etmez.

³⁵Ol seniň para-peşgeşiňe bakmaz, näçe töleseň-de, hiç razy bolmaz. ‎