Zebur 48

¹Reb beýikdir, Hudaýymyzyň şäherinde, Onuň mukaddes dagynda Ol aşa şöhratlandyrylmaga mynasypdyr.

²Belent, gözel Siýon dagy tutuş ýer ýüzüniň şatlygydyr; Siýon dagy Beýik Şanyň şäheri, ol Sapon dagynyň çür başy ýalydyr.

³Hudaý onuň galasynda Özüni berkitme hökmünde tanadýar.

⁴Ine, patyşalar agyz birikdirdiler, bilelikde ol ýerlerden geçdiler.

⁵Olar ony görenlerinde haýran galdylar, dowla düşüp, gaçyp gitdiler.

⁶Şol ýerde sandyrama tutdy olary, dogurýan aýalyň burgusy ýaly.

⁷Gündogar ýeliň Tarşyş gämilerini çym-pytrak edişi ýaly, Sen derbi-dagyn etdiň olary.

⁸Biz şäheriň şöhratyny eşitdik, indi bolsa ony – Hökmürowan Rebbiň bu şäherini özümiz gördük. Ol ony ebedi berkarar eder. Sela

⁹Eý, Hudaý, ybadathanaňda oýlanýarys wepaly söýgiň barada.

¹⁰Eý, Hudaý, Seniň adyň deý, alkyşyň-da ýeriň dört künjüne ýetýär. Seniň eliň adalatdan doludyr.

¹¹Goý, Siýon dagy begensin. Seniň adalatly hökümleriň hatyrasyna, Ýahudanyň gyzlary, goý, şat bolsun.

¹²Siýonyň daşynda gezip, ony aýlanyň, onuň diňlerini siz sanap çykyň.

¹³Onuň içki berkitmelerine üns beriň, geljek nesle aýtmak üçin, onuň köşklerine aýlanyp çykyň.

¹⁴Çünki bu Hudaý şunuň ýalydyr, Ol ebedi we baky Hudaýymyzdyr; ölýänçäk bize ýol görkezjek Oldur.