Exodus 40

¹locutusque est Dominus ad Mosen dicens

²mense primo die prima mensis eriges tabernaculum testimonii

³et pones in eo arcam dimittesque ante illam velum

⁴et inlata mensa pones super eam quae rite praecepta sunt candelabrum stabit cum lucernis suis

⁵et altare aureum in quo adoletur incensum coram arca testimonii tentorium in introitu tabernaculi pones

⁶et ante illud altare holocausti

⁷labrum inter altare et tabernaculum quod implebis aqua

⁸circumdabisque atrium tentoriis et ingressum eius

⁹et adsumpto unctionis oleo ungues tabernaculum cum vasis suis ut sanctificentur

¹⁰altare holocausti et omnia vasa eius

¹¹labrum cum basi sua omnia unctionis oleo consecrabis ut sint sancta sanctorum

¹²adplicabisque Aaron et filios eius ad fores tabernaculi testimonii et lotos aqua

¹⁵(40:13) indues sanctis vestibus ut ministrent mihi et unctio eorum in sacerdotium proficiat sempiternum

¹⁶(40:14) fecitque Moses omnia quae praeceperat Dominus

¹⁷(40:15) igitur mense primo anni secundi in prima die mensis conlocatum est tabernaculum

¹⁸(40:16) erexitque illud Moses et posuit tabulas ac bases et vectes statuitque columnas

¹⁹(40:17) et expandit tectum super tabernaculum inposito desuper operimento sicut Dominus imperarat

²⁰(40:18) posuit et testimonium in arca subditis infra vectibus et oraculum desuper

²¹(40:19) cumque intulisset arcam in tabernaculum adpendit ante eam velum ut expleret Domini iussionem

²²(40:20) posuit et mensam in tabernaculo testimonii ad plagam septentrionalem extra velum

²³(40:21) ordinatis coram propositionis panibus sicut praeceperat Dominus Mosi

²⁴(40:22) posuit et candelabrum in tabernaculum testimonii e regione mensae in parte australi

²⁵(40:23) locatis per ordinem lucernis iuxta praeceptum Domini

²⁶(40:24) posuit et altare aureum sub tecto testimonii contra velum

²⁷(40:25) et adolevit super eo incensum aromatum sicut iusserat Dominus

²⁸(40:26) posuit et tentorium in introitu tabernaculi

²⁹(40:27) et altare holocausti in vestibulo testimonii offerens in eo holocaustum et sacrificia ut Dominus imperarat

³⁰(40:28) labrum quoque statuit inter tabernaculum testimonii et altare implens illud aqua

³¹(40:29) laveruntque Moses et Aaron ac filii eius manus suas et pedes

³²(40:30) cum ingrederentur tectum foederis et accederent ad altare sicut praeceperat Dominus

³³(40:31) erexit et atrium per gyrum tabernaculi et altaris ducto in introitu eius tentorio postquam cuncta perfecta sunt

³⁴(40:32) operuit nubes tabernaculum testimonii et gloria Domini implevit illud

³⁵(40:33) nec poterat Moses ingredi tectum foederis nube operiente omnia et maiestate Domini coruscante quia cuncta nubes operuerat

³⁶(40:34) si quando nubes tabernaculum deserebat proficiscebantur filii Israhel per turmas suas

³⁷(40:35) si pendebat desuper manebant in eodem loco

³⁸(40:36) nubes quippe Domini incubabat per diem tabernaculo et ignis in nocte videntibus populis Israhel per cunctas mansiones suas