Jonæ 2

¹et oravit Iona ad Dominum Deum suum de utero piscis

²(2:3) et dixit clamavi de tribulatione mea ad Dominum et exaudivit me de ventre inferni clamavi et exaudisti vocem meam

³(2:4) et proiecisti me in profundum in corde maris et flumen circumdedit me omnes gurgites tui et fluctus tui super me transierunt

⁴(2:5) et ego dixi abiectus sum a conspectu oculorum tuorum verumtamen rursus videbo templum sanctum tuum

⁵(2:6) circumdederunt me aquae usque ad animam abyssus vallavit me pelagus operuit caput meum

⁶(2:7) ad extrema montium descendi terrae vectes concluserunt me in aeternum et sublevabis de corruptione vitam meam Domine Deus meus

⁷(2:8) cum angustiaretur in me anima mea Domini recordatus sum ut veniat ad te oratio mea ad templum sanctum tuum

⁸(2:9) qui custodiunt vanitates frustra misericordiam suam derelinquunt

⁹(2:10) ego autem in voce laudis immolabo tibi quaecumque vovi reddam pro salute Domino

¹⁰(2:11) et dixit Dominus pisci et evomuit Ionam in aridam