Numeri 13

¹ibi locutus est Dominus ad Mosen dicens

²(13:3) mitte viros qui considerent terram Chanaan quam daturus sum filiis Israhel singulos de singulis tribubus ex principibus

³(13:4) fecit Moses quod Dominus imperarat de deserto Pharan mittens principes viros quorum ista sunt nomina

⁴(13:5) de tribu Ruben Semmua filium Zecchur

⁵(13:6) de tribu Symeon Saphat filium Huri

⁶(13:7) de tribu Iuda Chaleb filium Iepphonne

⁷(13:8) de tribu Isachar Igal filium Ioseph

⁸(13:9) de tribu Ephraim Osee filium Nun

⁹(13:10) de tribu Beniamin Phalti filium Raphu

¹⁰(13:11) de tribu Zabulon Geddihel filium Sodi

¹¹(13:12) de tribu Ioseph sceptri Manasse Gaddi filium Susi

¹²(13:13) de tribu Dan Ammihel filium Gemalli

¹³(13:14) de tribu Aser Sthur filium Michahel

¹⁴(13:15) de tribu Nepthali Naabbi filium Vaphsi

¹⁵(13:16) de tribu Gad Guhel filium Machi

¹⁶(13:17) haec sunt nomina virorum quos misit Moses ad considerandam terram vocavitque Osee filium Nun Iosue

¹⁷(13:18) misit ergo eos Moses ad considerandam terram Chanaan et dixit ad eos ascendite per meridianam plagam cumque veneritis ad montes

¹⁸(13:19) considerate terram qualis sit et populum qui habitator est eius utrum fortis sit an infirmus pauci numero an plures

¹⁹(13:20) ipsa terra bona an mala urbes quales muratae an absque muris

²⁰(13:21) humus pinguis an sterilis nemorosa an absque arboribus confortamini et adferte nobis de fructibus terrae erat autem tempus quando iam praecoquae uvae vesci possunt

²¹(13:22) cumque ascendissent exploraverunt terram a deserto Sin usque Roob intrantibus Emath

²²(13:23) ascenderuntque ad meridiem et venerunt in Hebron ubi erant Ahiman et Sisai et Tholmai filii Enach nam Hebron septem annis ante Tanim urbem Aegypti condita est

²³(13:24) pergentesque usque ad torrentem Botri absciderunt palmitem cum uva sua quem portaverunt in vecte duo viri de malis quoque granatis et de ficis loci illius tulerunt

²⁴(13:25) qui appellatus est Neelescol id est torrens Botri eo quod botrum inde portassent filii Israhel

²⁵(13:26) reversique exploratores terrae post quadraginta dies omni regione circuita

²⁶(13:27) venerunt ad Mosen et Aaron et ad omnem coetum filiorum Israhel in desertum Pharan quod est in Cades locutique eis et omni multitudini ostenderunt fructus terrae

²⁷(13:28) et narraverunt dicentes venimus in terram ad quam misisti nos quae re vera fluit lacte et melle ut ex his fructibus cognosci potest

²⁸(13:29) sed cultores fortissimos habet et urbes grandes atque muratas stirpem Enach vidimus ibi

²⁹(13:30) Amalech habitat in meridie Hettheus et Iebuseus et Amorreus in montanis Chananeus vero moratur iuxta mare et circa fluenta Iordanis

³⁰(13:31) inter haec Chaleb conpescens murmur populi qui oriebatur contra Mosen ait ascendamus et possideamus terram quoniam poterimus obtinere eam

³¹(13:32) alii vero qui fuerant cum eo dicebant nequaquam ad hunc populum valemus ascendere quia fortior nobis est

³²(13:33) detraxeruntque terrae quam inspexerant apud filios Israhel dicentes terram quam lustravimus devorat habitatores suos populum quem aspeximus procerae staturae est

³³(13:34) ibi vidimus monstra quaedam filiorum Enach de genere giganteo quibus conparati quasi lucustae videbamur