Psalmi 114

¹cum egrederetur Israhel de Aegypto domus Iacob de populo barbaro

²(113:2) factus est Iudas in sanctificatione eius Israhel potestas eius

³(113:3) mare vidit et fugit Iordanis conversus est retrorsum

⁴(113:4) montes subsilierunt quasi arietes colles quasi filii gregis

⁵(113:5) quid tibi est mare quia fugisti Iordanis quia conversus es retrorsum

⁶(113:6) montes sussultastis quasi arietes colles quasi filii gregis

⁷(113:7) a facie Domini contremesce terra a facie Dei Iacob

⁸(113:8) qui convertit petram in paludes aquarum silicem in fontes aquarum