Psalmi 81

¹laudate Deum fortitudinem nostram iubilate Deo Iacob

²(80:3) adsumite carmen et date tympanum citharam decoram cum psalterio

³(80:4) clangite in neomenia bucina et in medio mense die sollemnitatis nostrae

⁴(80:5) quia legitimum Israhel est et iudicium Dei Iacob

⁵(80:6) testimonium in Ioseph posuit cum egrederetur terra Aegypti labium quod nesciebam audivi

⁶(80:7) amovi ab onere umerum eius manus eius a cofino recesserunt

⁷(80:8) in tribulatione invocasti et erui te exaudivi te in abscondito tonitrui probavi te super aquam Contradictionis semper

⁸(80:9) audi populus meus et contestor te Israhel si audieris me

⁹(80:10) non sit in te deus alienus et non adores deum peregrinum

¹⁰(80:11) ego sum Dominus Deus tuus qui eduxi te de terra Aegypti dilata os tuum et implebo illud

¹¹(80:12) et non audivit populus meus vocem meam et Israhel non credidit mihi

¹²(80:13) et dimisi eum in pravitate cordis sui ambulabunt in consiliis suis

¹³(80:14) utinam populus meus audisset me Israhel in viis meis ambulasset

¹⁴(80:15) quasi nihilum inimicos eius humiliassem et super hostes eorum vertissem manum meam

¹⁵(80:16) qui oderunt Dominum negabunt eum et erit tempus eorum in saeculo

¹⁶(80:17) et cibavit eos de adipe frumenti et de petra mellis saturavit eos