Canticum Canticorum 6

¹quo abiit dilectus tuus o pulcherrima mulierum quo declinavit dilectus tuus et quaeremus eum tecum

²(6:1) dilectus meus descendit in hortum suum ad areolam aromatis ut pascatur in hortis et lilia colligat

³(6:2) ego dilecto meo et dilectus meus mihi qui pascitur inter lilia

⁴(6:3) pulchra es amica mea suavis et decora sicut Hierusalem terribilis ut castrorum acies ordinata

⁵(6:4) averte oculos tuos a me quia ipsi me avolare fecerunt capilli tui sicut grex caprarum quae apparuerunt de Galaad

⁶(6:5) dentes tui sicut grex ovium quae ascenderunt de lavacro omnes gemellis fetibus et sterilis non est in eis

⁷(6:6) sicut cortex mali punici genae tuae absque occultis tuis

⁸(6:7) sexaginta sunt reginae et octoginta concubinae et adulescentularum non est numerus

⁹(6:8) una est columba mea perfecta mea una est matris suae electa genetrici suae viderunt illam filiae et beatissimam praedicaverunt reginae et concubinae et laudaverunt eam

¹⁰(6:9) quae est ista quae progreditur quasi aurora consurgens pulchra ut luna electa ut sol terribilis ut acies ordinata

¹¹(6:10) descendi ad hortum nucum ut viderem poma convallis ut inspicerem si floruisset vinea et germinassent mala punica

¹²(6:11) nescivi anima mea conturbavit me propter quadrigas Aminadab

¹³(6:12) revertere revertere Sulamitis revertere revertere ut intueamur te