1 KwabaseTesalonika 5

¹Ke kaloku ngawo amaxesha namathuba, bazalwana, akufuneki nganto ukuba ndinibhalele;

²kuba nani ngokwenu niyazi ngokucacileyo, ukuba imini yeNkosi, njengesela ebusuku, yenjenjalo ukuza kwayo.

³Kuba xenikweni baya kuthi, Luxolo nokunqaba, oko baya kufikelwa yintshabalaliso ngebhaqo, kwanjengenimba komithiyo; baye bengayi kukha basinde.

⁴Ke nina, bazalwana, anisebumnyameni, ukuba imini leyo iniqubule njengesela.

⁵Nonke nina ningabokukhanya, abemini; asingabobusuku, asingabobumnyama.

⁶Ngoko ke masingalali, njengabanye aba; masiphaphe sibe ziingcathu.

⁷Kuba abaleleyo balala ebusuku; nabanxilayo banxila ebusuku.

⁸Ke thina bangabemini masibe ziingcathu; masinxibe isigcina-sifuba sokholo nothando, nesigcina-ntloko esilithemba losindiso.

⁹Ngokuba uThixo akasimiselanga ngqumbo; usimisele ukuzuza usindiso ngayo iNkosi yethu uYesu Kristu;

¹⁰owasifelayo, ukuze nokuba sihleli, nokuba silele, sidle ubomi kwakunye naye.

¹¹Kungoko ndithi, Thuthuzelanani, nakhane, kwanjengokuba nisenjenjalo.

¹²Ke kaloku siyanicela, bazalwana, ukuba nibazi ababulalekayo phakathi kwenu, abanongamelayo eNkosini, abanilulekayo,

¹³nibabeke ngokugqithiseleyo kakhulu ukubathanda, ngenxa yomsebenzi wabo. Hlalani ninoxolo phakathi kwenu.

¹⁴Siyanivuselela ke, bazalwana, balulekeni abanxaxhayo; bakhuzeni abamxhelo mncinane; basekeleni abathambileyo; yibani nokuzeka kade umsindo kubantu bonke.

¹⁵Lumkani, kungabikho bani ubuyekeza ububi ngobubi nakubani; hlalani niphuthuma okulungileyo omnye komnye, nakubantu bonke.

¹⁶Hlalani nivuya.

¹⁷Thandazani ningayeki.

¹⁸Ezintweni zonke bulelani; kuba oko kukuthanda kukaThixo kuKristu Yesu ngani.

¹⁹UMoya musani ukumcima.

²⁰Iziprofeto musani ukuzenza into engento.

²¹Izinto zonke zicikideni, nibambe leyo intle.

²²Khumkani kuzo zonke iintlobo zenkohlakalo.

²³Wanga ke uThixo woxolo ngokwakhe anganingcwalisa niphelelisekile; uthi, ugqibelele owenu umoya nomphefumlo nomzimba, ugcinwe ngokungenakusoleka ekufikeni kweNkosi yethu uYesu Kristu.

²⁴Uthembekile onibizayo, oya kukwenza nokukwenza oko.

²⁵Bazalwana, sithandazeleni.

²⁶Babuliseni abazalwana bonke ngolwango olungcwele.

²⁷Ndiyanifungisa iNkosi ukuba le ncwadi ileswe kubo bonke abazalwana abangcwele.

²⁸Ubabalo lweNkosi yethu uYesu Kristu malube nani. Amen.