2 KaSamuweli 22

¹Wathetha uDavide kuYehova amazwi ale ngoma, mini uYehova wamhlangulayo esandleni seentshaba zakhe zonke, nasesandleni sikaSawule, wathi:

²Yehova, ngxondorha yam, mboniselo yam, msizi wam mna lo,

³Thixo oliliwa lam, endizimela ngalo; Ngweletshetshe yam, luphondo losindiso lwam, Ngxonde yam, ndawo yokusabela kwam, Msindisi wam, undisindisa ekugonyamelweni.

⁴Ndinqula uYehova ongowokudunyiswa, Ndiyasindiswa ke ezintshabeni zam.

⁵Akundijikela amaza alwayo okufa, Yakundidandathekisa imilambo yobutshijolo,

⁶Zakundibhijela izintya zelabafileyo, Zakundirhintyela izirhintyelo zokufa,

⁷Ekubandezelekeni kwam, ndanqula uYehova, Ndamnqula uThixo wam: Waliva etempileni yakhe izwi lam, Ukuzibika kwam kwafika ezindlebeni zakhe.

⁸Lahexa ke lanyikima ihlabathi, Iziseko zezulu zagungqa, Zahexa ngokuba enomsindo.

⁹Kwathi thaphu umsi emathatheni akhe, Wadla umlilo uphuma emlonyeni wakhe, Avutha amalahle, ephuma kuwo.

¹⁰Wawathoba amazulu, wehla, Yangamafu amnyama phantsi kweenyawo zakhe.

¹¹Wakhwela ekerubhini, waphaphazela, Wabonakala esemaphikweni omoya.

¹²Wamisa ubumnyama ngeenxa zonke kuye, bayiminquba, Intlanganisela yamanzi, neengqimba zamafu.

¹³Ekuqaqambeni okuphambi kwakhe Kwavutha amalahle omlilo.

¹⁴Wadudumisa emazulwini uYehova, Oseyangweni walikhupha izwi lakhe.

¹⁵Wathuma iintolo, wabaphangalalisa; Umbane, wabadubaduba.

¹⁶Kwabonakala imiphantsi yolwandle, Kwatyhileka iziseko zelimiweyo Ngokukhalima kukaYehova, Ngokufutha komoya womsindo wakhe.

¹⁷Wolula isandla, ephezulu, wandibamba, Wandirhola emanzini amaninzi.

¹⁸Wandihlangula elutshabeni lwam olunamandla, Kwabandithiyileyo, ngokuba bebomelele kunam.

¹⁹Bandifikela ngemini yokusindeka kwam, Waba sisixhaso kum uYehova.

²⁰Wandikhuphela endaweni ebanzi, Wandihlangula ngokuba endinonelele.

²¹UYehova wandiphatha kakuhle ngokobulungisa bam, Wandibuyisela ngokuhlambululeka kwezandla zam.

²²Ngokuba ndazigcina iindlela zikaYehova, Andemka ngokungendawo kuThixo wam.

²³Ngokuba onke amasiko akhe aphambi kwam; Nemimiselo yakhe, andityekanga kuyo.

²⁴Ndandingogqibeleleyo kuye, Ndazinqanda ebugwenxeni bam.

²⁵Wandibuyisela ke uYehova ngokobulungisa bam, Ngokobunyulu bam, phambi kwamehlo akhe.

²⁶Kowenceba uzenza owenceba, Kwigorha eligqibeleleyo uzenza ogqibeleleyo.

²⁷Kozenze nyulu uzenza onyulu, Kojibilizayo uzenza onobuqhokolo.

²⁸Abantu abaziintsizana uyabasindisa, Amehlo akho ajongene nabaqwayingileyo, ubathobe.

²⁹Kuba usisibane sam, wena Yehova, UYehova ukhanyisela ubumnyama bam.

³⁰Kuba ngawe ndigila impi, NgoThixo wam nditsiba iindonga.

³¹UThixo yena—igqibelele indlela yakhe, Ilizwi likaYehova linyibilikisiwe, Uyingweletshetshe kubo bonke abazimela ngaye.

³²Ngokuba ngubani na onguThixo, ingenguye uYehova? Ngubani na oliliwa, ingenguThixo wethu?

³³UloThixo uligwiba lam elinamandla, Umalathisayo ogqibeleleyo indlela yakhe;

³⁴Uzifanisayo iinyawo zam nezamaxhamakazi, Undimisayo emimangweni yam;

³⁵Uzifundisayo ukulwa izandla zam, Zigobe isaphetha sobhedu iingalo zam.

³⁶Undinike ingweletshetshe yosindiso lwakho, Ukundiphulaphula kwakho kwandikhulisa.

³⁷Uwenzele indawo ebanzi amanyathela am phantsi kwam, Amaxhwele am akahexa.

³⁸Ndiya kuzisukela iintshaba zam, ndizitshabalalise, Ndingabuyi zide ziphele.

³⁹Ndiya kuzigqiba, ndiziphaluse, zingavuki, Ziwe phantsi kweenyawo zam.

⁴⁰Undibhinqise ukukhaliphela imfazwe, Ubaguqisa phantsi kwam abasukela phezulu kum.

⁴¹Iintshaba zam uzenze zandinikela ikhosi, Abandithiyayo ndababhangisa.

⁴²Bayabhekabheka, kungabikho msindisi; KuYehova, angabaphenduli.

⁴³Ndibacola njengothuli lomhlaba, Ndibacumza, ndibaxovula njengodaka lwendlela, ndibasasaze.

⁴⁴Undisiza ekubambaneni kwabantu bam nam, Undigcina ndibe yintloko yeentlanga. Abantu ebendigabazi baya ndikhonza.

⁴⁵Oonyana bolunye uhlanga baya kundilulamela, behanahanisa, Bandithobele besave ngeendlebe.

⁴⁶Oonyana bolunye uhlunga bayantshwenya, Baphuma benovalo ekuvingcelweni kwabo.

⁴⁷UYehova uhleli, lelokubongwa iliwa lam, Aphakanyiswe uThixo, iliwa losindiso lwam.

⁴⁸UloThixo undiphindezelayo, Uzihliselayo phantsi kwam izizwe,

⁴⁹Undikhuphayo ezintshabeni zam; Undiphakamisayo kwabasukela phezulu kum; Undihlangulayo kumfo ogonyamelayo.

⁵⁰Ngenxa yoko ndiya kubulela kuwe, Yehova, phakathi kweentlanga, Ndivume kwigama lakho.

⁵¹Ulokhulisa usindiso lokumkani wakhe; Owenzayo inceba kumthanjiswa wakhe, KuDavide, nakwimbewu yakhe kude kuse ephakadeni.