UYobhi 10

¹Umphefumlo wam udimele bubomi bam; Ngoko ndiya kuyivulela inkalazo yam phakathi kwam; Ndithethe, ukrakra umphefumlo wam;

²Ndithi kuThixo, Musa ukundigweba; Ndazise ukuba ubambene nam ngani na?

³Kulungile na kuwe ukuba ucudise, Ukuba ucekise ukuxelenga kwezandla zakho, Ulibengezelele iqhinga labangendawo?

⁴Unamehlo enyama na? Ubona ngokubona komntu na?

⁵Injengemihla yomntu na imihla yakho, Iminyaka yakho injengemihla yomfo na:

⁶Ukuba nje ubufune ubugwenxa bam, Usingxoke isono sam,

⁷Usazi nje ukuba andingongendawo, Nokuba akukho unokuhlangula esandleni sakho?

⁸Izandla zakho zindiyilile, zandenza Ndonke, ngeenxa zonke; uyandiginya noko.

⁹Khawukhumbule, ukuba undenze ngokodongwe; Ke undibuyisa undise eluthulini!

¹⁰Akundithululanga na njengamasi, Wandivuthisa njengengqaka?

¹¹Wandambesa ngolusu nenyama, Wandiphingela ngamathambo nemisipha.

¹²Undenzele ubomi nenceba, Nokuvelela kwakho kwawugcina umoya wam.

¹³Ezi zinto ke wazigusha entliziyweni yakho; Ndiyazi ukuba ubunale ndawo yokuthi:

¹⁴Ukuba ndithe ndona, wondibamba undilinde, Ungandenzi msulwa ebugwenxeni bam.

¹⁵Ukuba ndithe ndabangongendawo, athi ke mna! Ukuba ndithe ndaba lilungisa, ndingayiphakamisi intloko yam: Ndihluthi kukucukucezwa, Nakukubona iintsizi zam.

¹⁶Nokuba ithe yaziphakamisa intloko yam, wondizingela njengengonyama, Ubuye wenze ngokubalulekileyo kum;

¹⁷Uhlaziye amangqina akho phambi kwam; Uyandise ingqumbo yakho kum, Ibe kukukhululana kwemikhosi eza kum.

¹⁸Ibiyini na ke ukuba undikhuphe esizalweni? Ngendaphuma umphefumlo, andabonwa liso,

¹⁹Ndanga andibangakho, Ngendasuswa esizalweni, ndasiwa engcwabeni.

²⁰Ayimbalwa na imihla yam? Makayeke, Adede kum, ndikhe ndincumeze kancinane,

²¹Phambi kokuba ndihambe, ndingabi sabuya, Ndiye ezweni lobumnyama nelethunzi lokufa,

²²Ezweni elisongelwe bubumnyama njengesithokothoko, Lethunzi lokufa nelesidubedube, Elinkazimlo injengesithokothoko.