UYobhi 39

¹Uyalazi na ixesha lokuzala kwamagogo asemaweni, Ugqale ukuzuza kwamaxhamakazi?

²Uyazibala na iinyanga azizalisayo, Ulazi na ixesha lokuzala kwawo?

³Uyaguqa, azale, Akhuphe inkonyana.

⁴Ayomelela amankonyana awo, akhula emathafeni, Aphuma, angabi sabuya.

⁵Ngubani na olindululeyo iesile lasendle likhululekile? Iimbophelelo ze-esile elindwebileyo, ngubani na ozithukululeyo,

⁶Endilimisele inkqantosi ukuba ibe yindlu yalo, Neendawo ezinetyuwa zibe likhaya lalo?

⁷Liyayihleka ingxokolo yomzi, Aliyiva ingxolo yomqhubi.

⁸Umfuno weentaba bubutyani balo, Lilanda lonke uhlaza.

⁹Yovuma na inqu ukukukhonza, Ilale esitalini sakho?

¹⁰Unokuyibopha na inqu emqeleni ngomqokozo wayo, Iqwakanise iintili ikulandela?

¹¹Wokholosa na ngayo, ngokuba emakhulu amandla ayo, Ukushiye nayo ukuxelenga kwakho?

¹²Unokukholwa na kuyo, ukuba yoyigodusa imbewu yakho, Ibuthele esandeni sakho?

¹³Iphiko lencinibakazi liyaphapha: Lunenceba yengwamza na ke usiba lwayo, noboya bayo?

¹⁴Hayi bo! Iwashiya emhlabeni amaqanda ayo, Ifukamele eluthulini;

¹⁵Ilibale ukuba unyawo lowatyumza, Nerhamncwa lasendle lowanyathela.

¹⁶Iyawabukula amathole ayo ngathi asingawayo, Kuphalale ukuxelenga kwayo, ingaxhali.

¹⁷Ngokuba uThixo wenze yabulibala ubulumko, Akayabela ingqondo.

¹⁸Xesha limbi izibetha iphakame, Ilihleke ihashe nomkhweli walo.

¹⁹Linikwa nguwe na ihashe ubukroti? Uyambathise intamo yalo ngobuyakayaka?

²⁰Nguwe na oliqakathisa njengenkumbi? Isandi somfutho walo siyothusa.

²¹Liyagquba entilini ngamanqina, lenze amagqasi ngamandla; Liphuma likhawulele umkhosi onesikrweqe.

²²Liyakuhleka ukunkwantya; aliqhiphuki mbilini; Alijiki phambi kwekrele.

²³Urhashaza phezu kwalo umphongolo, Nentshuntshe ebengezelayo, nenkcula.

²⁴Ngentshakavu nangengcwangu liginya ilizwe; Alimi kwakuvuthelwa isigodlo.

²⁵Okuvuthela sivuthelwayo isigodlo, lisuka ngathi lithi, Ngxatsho ke! Lisezela imfazwe kwakude, Nokududuma kwabathetheli, nokufunza.

²⁶Intambanane iphaphazela ngengqondo yakho na, Yolule amaphiko ayo, ibheke ezantsi?

²⁷Kungomthetho wakho na, ukuba ixhalanga linyuke, Liyiphakamise indlu yalo,

²⁸Lihlale engxondorheni, lilale Etsolweni lengxondorha, nasemboniselweni?

²⁹Lilapho lihlola ukudla; Amehlo alo ondele kude.

³⁰Amathole alo afunxa igazi; Nalapho bakhona abangxwelerhiweyo, likhona nalo.