ImiZekeliso 17

¹Iqhekeza elomileyo lesonka, kunye nokuchulumacha, lilungile Ngaphezu kwendlu ezele yimibingelelo, enembambano.

²Umkhonzi onengqiqo uya kumlawula unyana owenza okuziintloni, Ahlule ilifa phakathi kwabazalwana.

³Ukhamba lolokunyibilikisa isilivere; iziko lelokunyibilikisa igolide; Umcikidi weentliziyo nguYehova.

⁴Onobubi uwubazela indlebe umlomo onenkohliso, Uphulaphula ubuxoki obuselulwimini olweyeliselayo.

⁵Ogculela ihlwempu ungcikiva uMenzi walo; Ovuyela inkxwaleko akabi msulwa.

⁶Isithsaba samadoda amakhulu ngoonyana boonyana; Isihombo soonyana ngooyise.

⁷Ayisifanele isidenge intetho ekhukhumeleyo; Yobeka phi na ke ukungalifaneli inene intetho ebubuxoki.

⁸Sililitye elinqabileyo emehlweni omninilo isicengo, Apho asukuba ebheka khona, wenza ngengqiqo.

⁹Ugubungela isikreqo ofuna uthando; Ophinda ayithethe into wahlula amakholwane.

¹⁰Ukukhalinyelwa kuyangena konengqondo Ngaphezu kwemivumbo elikhulu kosisinyabi.

¹¹Oneenkani ufuna ububi bodwa; Ngoko ke uthunyelwa umthunywa osisijorha.

¹²Kanye qubisana nebhere ehluthwe amathole ayo, Ungaqubisani nesinyabi ekumatheni kwaso.

¹³Obuyekeza okubi esikhundleni sokulungileyo, Abuyi kusuka ububi endlwini yakhe.

¹⁴Kukuvulela amanzi ukuqala kwengxabano; Yiyeke imbambano kungekavunganyewana.

¹⁵Omgwebelayo ongendawo, kwanoligwebayo ilungisa, Bangamasikizi kuYehova bobabini.

¹⁶Lelokwenzani na inani elisesandleni sesinyabi, lokurhweba ubulumko, Singenantliziyo nje?

¹⁷Umhlobo uthanda ngamaxesha onke; Umzalwana uzalelwe imbandezelo.

¹⁸Umntu oswele intliziyo ngobambana nomnye ngesandla, Ngomela umelo phambi kowabo.

¹⁹Uthanda ukreqo othanda ukulwa; Owuphakamisayo umnyango wakhe ufuna ukuqhekeka.

²⁰Ontliziyo ijibilizayo akayi kukufumana okulungileyo; Ophenduka ngolwimi lwakhe weyela ebubini.

²¹Ozala isinyabi uzizalela isingqala; Akanaluvuyo uyise wesidenge.

²²Intliziyo evuyileyo iyalungisa, ichachise; Umoya odakumbileyo uyawomisa amathambo.

²³Ongendawo wamkela isicengo esivela esondweni lengubo, Ukuze agqwethe indlela esesikweni.

²⁴Ubuso bonengqondo bubheke ebulumkweni; Ke amehlo esinyabi asekupheleni kwehlabathi.

²⁵Ububuhlungu bukayise unyana osisinyabi; Ububukrakra kumzalikazi wakhe.

²⁶Akulungile ukuhlawulisa nelungisa, Nokubetha amanene ngenxa yokuthe tye.

²⁷Owanqandayo amazwi akhe unokwazi: Omoya upholileyo yindoda enengqondo.

²⁸Kwanesimathane, ukuba sihleli sathi tu, kuthiwa sisilumko; Singawuvingca umlomo waso, kuthiwa sinengqondo.