ImiZekeliso 20

¹Ingumgxeki iwayini, singumxokozeli isiselo esinxilisayo; Bonke abayotywe yiyo abalumkile.

²Ngumgqumo onjengowengonyama entsha umothuso wokumkani; Omqumbisayo wona umphefumlo wakhe.

³Kuluzuko endodeni ukuhlalela kude nengxabano; Ke zona izimathane zonke ziyavungama.

⁴Ebusika ivila alilimi; Liyafuna ngexa lokuvuna, kungabikho nto.

⁵Ngamanzi anzulu icebo entliziyweni yendoda, Kanti indoda enengqondo iyalirhola.

⁶Uninzi lwesintu luyayihlangabeza indoda enenceba kulo; Ke yona indoda enyanisileyo, ngubani na ongayifumanayo?

⁷Ohamba ngengqibelelo yakhe elilungisa, Hayi, uyolo loonyana bakhe emva kwakhe!

⁸Ukumkani, ehleli esihlalweni sokugweba, Uchithachitha ububi bonke ngamehlo akhe.

⁹Ngubani na ongathi, Ndiyiqaqambisile intliziyo yam, Ndihlambulukile esonweni sam?

¹⁰Amatye ngamatye, iiefa ngee-efa, Ngamasikizi kuYehova ezo nto zombini.

¹¹Nenkwenkwe iyazazisisa ngeentlondi zayo, Nokuba kuqaqambile na, nokuba kuthe tye na, ukwenza kwayo.

¹²Indlebe evayo, neliso elibonayo, UYehova uzenzile ezo zinto zombini.

¹³Musa ukuthanda ubuthongo, hleze uhlwempuzeke; Vula amehlo akho, uhluthe kukudla.

¹⁴Imbi, imbi! utsho othengayo; Emke, andule aqhayise.

¹⁵Kukho igolide, neekorale ezininzi; Ke yona impahla enqabileyo ngumlomo onokwazi.

¹⁶Thabatha ingubo yakhe omele omnye; Menze isibambiso ngenxa yabasemzini.

¹⁷Sinencasa endodeni isonka sobuxoki; Ke emveni koko umlomo wayo uzala luhlalu.

¹⁸Iingcinga zizinyaswa yingcebiswano; Yilwa imfazwe unecebo elilungileyo.

¹⁹Ohamba ehleba uhlakaza ucweyo; Ungadibani nepholopholo.

²⁰Otshabhisa uyise nonina, Isibane sakhe sicima ebumnyameni phakathi.

²¹Ilifa elizuzwe buphuthuphuthu ekuqaleni, Ukuphela kwalo akunantsikelelo.

²²Musa ukuthi, Ndiya kubuphindezela ububi; Thembela kuYehova, wokusindisa.

²³Ngamasikizi kuYehova amatye ngamatye; Nesikali esikhohlisayo asilungile.

²⁴Kuvela kuYehova ukunyathela kwendoda; Umntu angathini na ukuyiqonda indlela yakhe?

²⁵Sisirhintyelo emntwini ukufumana athi, Ingcwele, Aze aqale emva kwesibhambathiso, aphicothe.

²⁶Uchithachitha abangendawo ukumkani olumkileyo, Aguqulele phezu kwabo umlenze wenqwelo.

²⁷Sisibane sikaYehova umphefumlo womntu, Siphengulula zonke iingontsi zombilini.

²⁸Inceba nenyaniso ilondoloza ukumkani; Uyixhasa itrone yakhe ngenceba.

²⁹Isihombo samadodana ngamandla awo; Ubuhle bamadoda amakhulu zizimvi.

³⁰Imivumbo etyabulayo iguxa ububi; Izibetho ziguxa iingontsi zombilini.