ImiZekeliso 25

¹Nale yimizekeliso kaSolomon, awayihlanganisayo amadoda kaHezekiya, ukumkani wakwaYuda.

²Luzuko lukaThixo ukuyisithelisa into; Luzuko lokumkani ukuyigocagoca.

³Izulu ngokuphakama, umhlaba ngobunzulu, Nentliziyo yokumkani asinto inokugocwagocwa.

⁴Longule igwebu esilivereni, Kuvele isitya somnyibilikisi;

⁵Shenxisa abangendawo ebusweni bokumkani, Yozinza itrone yakhe ngobulungisa.

⁶Musa ukudokozelisa ilizwi phambi kokumkani, Ungazimisi endaweni yabakhulu.

⁷Kuba kulungile ukuba kuthiwe kuwe, Nyukela apha, Kunokuba uthotywe phambi kwenene, Alibonileyo amehlo akho.

⁸Musa ukuphuma ungxamile, ukuya ekubambaneni nomnye, Hleze kuthiwe, Wothini na emveni koko? Xa kaloku akuhlazileyo ummelwane wakho.

⁹Ubambene nommelwane wakho, bambana naye; Ke ucweyo lomnye musa ukuluhlakaza,

¹⁰Hleze akuhlaze oluvayo, Lungabi sabuya lusuke udaba lwakho olubi.

¹¹Ziilamuni zegolide kwizitya zesilivere ezimakhazikhazi Ilizwi elithethwe latyapha.

¹²Ulijikazi legolide, nezidanga zegolide ezicikizekileyo Umohlwayi olumkileyo ezindlebeni ezinokuva.

¹³Sinjengokuphozisa kwekhephu ngemini yokuvuna Isigidimi esinyanisileyo kwabasithumileyo: Siyawubuyisa umphefumlo wenkosi yaso.

¹⁴Ungamafu anomoya, angenamvula, Umntu oqhayisa ngesipho esikhohlisayo.

¹⁵Umlawuli uyarhwebesheka ngokuzeka kade umsindo; Ulwimi oluthambileyo lwaphula ithambo.

¹⁶Ufumene ubusi, yidla obukulingeneyo, Hleze udikwe, ubuhlanze.

¹⁷Malungayi futhi unyawo lwakho endlwini yommelwane wakho, Hleze adikwe nguwe, akuthiye.

¹⁸Sisando, likrele, lutolo olutsolileyo, Indoda engqina ubungqina obubuxoki ugommelwane wayo.

¹⁹Lizinyo eliqhuzukileyo, lunyawo olukrunekileyo, Ukukholosa ngenginingini ngemini yembandezelo.

²⁰Olahla ingubo yokwaleka ngemini yengqele, nqwa kwaneviniga egalelwe kwisoda, Kwanovuma iingoma kontliziyo imbi.

²¹Ukuba okuthiyileyo uthe walamba, mphe ukudla adle; Ukuba uthe wanxanwa, mseze amanzi;

²²Kuba ufumba wena amalahle avuthayo entlokweni yakhe; UYehova wokuvuza.

²³Umoya ovela ngasentla uvelisa isiphango; Ulwimi oluhlebayo luvelisa ubuso obujalileyo.

²⁴Kulungile ukuhlala elungqamekweni oluphezu kwendlu, Kunokuhlala ndlwini-nye nomfazi onengxabano.

²⁵Ngamanzi abandayo emphefumlweni otyhafileyo Iindaba ezilungileyo, ezivela ezweni elikude.

²⁶Liqula eligxojiweyo, ngumthombo owonakeleyo, Ilungisa elikhwelelayo phambi kongendawo.

²⁷Ukudla ubusi obuninzi akulungile; Ke ukugocagoca izinto ezinzima luzuko.

²⁸Ngumzi otyhoboziweyo, ongenaludonga, Indoda engenakuzibamba umoya wayo.