ImiZekeliso 8

¹Abumemezi na ubulumko? Nengqondo ayilikhuphi na ilizwi layo?

²Emantloko eendawo eziphezulu ngasendleleni, Ekuhlanganeni kweendlela, buzimisile.

³Ngasemasangweni, ekuphumeni kuso isixeko, Ekungeneni eminyango, buyamemelela, buthi:

⁴Ndimemeza kuni, madoda; Izwi lam ndilisingisa koonyana babantu.

⁵Buqondeni ubuqili, ziyatha; Yiqondeni intliziyo, zinyabi.

⁶Yivani, kuba ndithetha izinto zobuhlalu, Nokuvula imilebe yomlomo wam kuthe tye.

⁷Ngokuba umlomo wam uxela inyaniso; Okungendawo kulisikizi emilebeni yomlomo wam.

⁸Yonke intetho yomlomo wam isebulungiseni; Kuyo akukho kubhijeneyo nokujibilizayo.

⁹Yonke iphela ithe gca konengqondo, Ithe tye kwabafumene ukwazi.

¹⁰Yamkelani uqeqesho lwam, ningamkeli silivere; Yamkelani ukwazi ngaphezu kwegolide embiweyo, enyuliweyo.

¹¹Kuba ubulumko bulungile ngaphezu kwekorale, Neento zonke ezinqwenelwayo azilingani nabo.

¹²Mna, bulumko, ndakhele ebuqilini; Ndinokukufumana ukuyazi iminkqangiyelo.

¹³Ukoyika uYehova kukuthiya into embi: Ikratshi nokukratsha, nendlela embi, Nomlomo onempenduka, ndiwuthiyile.

¹⁴Likum icebo nozimaso; Ndiyingqondo, bobam ubugorha.

¹⁵Ookumkani banobukumkani ngam; Nezidwangube zimisa ubulungisa ngam.

¹⁶Bathethela ngam abathetheli, Namanene, nabagwebi bonke behlabathi.

¹⁷Abandithandayo ndiyabathanda nam; Nabandifunayo kwakusasa bayandifumana.

¹⁸Bunam ubutyebi nozuko, Ubuncwane obusisimakade nobulungisa.

¹⁹Silungile isiqhamo sam ngaphezu kwegolide embiweyo, nakwengcwengekileyo; Lulungile ungeniselo lwam ngaphezu kwesilivere enyuliweyo.

²⁰Ndihamba ngomendo wobulungisa, Phakathi kweendlela ezisesikweni;

²¹Ukuze abandithandayo ndibadlise ilifa elililo, Ndizizalise izindlu zabo zobuncwane.

²²UYehova wandivelisa ndaba yintlahlela yendlela yakhe, Ndaba ngowamandulo emisebenzini yakhe yakudala.

²³Ndamiswa kwasephakadeni, kwasentloko, Kwasemandulweni ehlabathi.

²⁴Ndazalwa kungekabikho manzi anzongonzongo, Kungekabikho mithombo inzima ngamanzi.

²⁵Ndazalwa kungekafakwa ntaba, Naphambi kweenduli;

²⁶Engekawenzi umhlaba namaphandle, Nothuli lonke lwelimiweyo.

²⁷Ekulilungiseni kwakhe izulu, ndandikho apho; Ekubuzungulezeni kwakhe ngomda ubuso bamanzi anzongonzongo;

²⁸Ekusiqiniseni kwakhe isibhakabhaka phezulu; Ekugalelekeni kwemithombo yamanzi anzongonzongo;

²⁹Ekulumiseleni kwakhe ulwandle umda walo, Ukuba amanzi angawugqithi umthetho wakhe; Ekuzimiseni kwakhe iziseko zehlabathi:

³⁰Ndaye ndinaye, ndiyingcibi yomsebenzi, Ndiziyolisa ngokwam iimini ngeemini;

³¹Ndidlala phambi kwakhe ixesha lonke, Ndidlala kwelimiweyo ihlabathi lakhe; Nokuziyolisa kwam kukoonyana babantu.

³²Ke ngoko, bonyana, ndiveni; Hayi, uyolo lwabazigcinayo iindlela zam!

³³Yivani uqeqesho, nibe nobulumko, Ningaluyeki.

³⁴Hayi, utolo lomntu ondivayo, Elinde ezingcangweni zam iimini ngeemini, Egcine emigubasini yeminyango yam!

³⁵Kuba ofumana mna, ufumene ubomi; Uzuze okukholekileyo kuYehova.

³⁶Ophosana nam wona owakhe umphefumlo; Bonke abandithiyayo bathanda ukufa.