IiNdumiso 118

¹Bulelani kuYehova, ngokuba elungile, Ngokuba ingunaphakade inceba yakhe.

²Makathi uSirayeli, Ingunaphakade inceba yakhe.

³Mayithi indlu ka-Aron, Ingunaphakade inceba yakhe.

⁴Mabathi abamoyikayo uYehova, Ingunaphakade inceba yakhe.

⁵Ndabiza uYehova ndisengxingongweni; Wandiphendula uYehova, wandibeka endaweni ebanzi.

⁶UYehova ungakum, andoyiki; Angandenza ntoni na umntu?

⁷UYehova ungakum ngokundinceda; Ndiya kubona mna kwabandithiyayo.

⁸Kulungile ukuzimela ngoYehova, Ngaphezu kokukholosa ngomntu.

⁹Kulungile ukuzimela ngoYehova Ngaphezu kokukholosa ngamanene.

¹⁰Zingafanelana zonke iintlanga zindirhawule: Egameni likaYehova inene ndozinqumla.

¹¹Zingafanelana zindirhawule zandirhawula: Egameni likaYehova inene ndozinqumla.

¹²Zingafanelana zindirhawule njengeenyosi: Zocinywa njengomlilo weentsasa; Egameni likaYehova inene ndozinqumla.

¹³Undityhale ngamandla wena ukuba ndiwe; Kodwa uYehova wandinceda.

¹⁴Iqhayiya lam nengoma yam nguYehova, Waba lusindiso kum.

¹⁵Izwi lokumemelela nelosindiso lisezintenteni zamalungisa, lisithi, Isandla sokunene sikaYehova siyeyisa;

¹⁶Isandla sokunene sikaYehova siphakamile; Isandla sokunene sikaYehova siyeyisa.

¹⁷Andiyi kufa, ndiya kudla ubomi, Ndibalise ngezenzo zikaYehova.

¹⁸UYehova undithethise kakhulu, Ke akandinikela ekufeni.

¹⁹Ndivuleleni amasango obulungisa; Ndiya kungena ngawo, ndiya kubulela kuYehova.

²⁰Nali isango likaYehova, Amalungisa angena ngalo.

²¹Ndiyabulela kuwe kuba undiphendule, Waba lusindiso kum.

²²Ilitye abalilahlayo abakhi Laba yintloko yembombo.

²³Kuvele kuYehova oku, Kungumsebenzi obalulekileyo emehlweni ethu.

²⁴Le yimini ayenzileyo uYehova, Masigcobe sivuye ngayo.

²⁵Yehova, camagu, khawusindise, Yehova, camagu, khawuhlangule.

²⁶Makabongwe lo uzayo esegameni likaYehova, Siyanisikelela nina basendlwini kaYehova.

²⁷UYehova nguThixo, usikhanyisela; Bophelelani umbingelelo womthendeleko ngeentambo, Kude kuye ezimpondweni zesibingelelo.

²⁸UnguThixo wam, ndiya kubulela kuwe; UnguThixo wam, ndiya kukuphakamisa.

²⁹Bulelani kuYehova, ngokuba elungile, Ngokuba ingunaphakade inceba yakhe.