IiNdumiso 139

¹Kumongameli; ekaDavide. Umhobe. Yehova, undigocagocile, wandazi.

²Wena uyakwazi ukuhlala kwam nokusuka kwam; Uyaziqonda izicamango zam nakude.

³Ukuhamba kwam nokulala kwam, uyakwela; Uqhelene neendlela zam zonke.

⁴Ngokuba akukho lizwi elulwimini lwam Ongalaziyo ke, Yehova, kanye.

⁵Ngasemva nangaphambili undingqingile, Wasibeka phezu kwam isandla sakho.

⁶Kubalulekile kum oko kwazi, Kuphezulu, kundinqabele.

⁷Ndingahambela phi na ukumka emoyeni wakho? Ndingabalekela phi na ukumka ebusweni bakho?

⁸Ukuba ndithe ndenyuka ndaya emazulwini, ulapho wena; Ukuba ndithe ndazandlalela kwelabafileyo, nanko ukho.

⁹Ukuba ndithe ndaphakamisa amaphiko esifingo, Ndaya ndahlala ekupheleni kolwandle,

¹⁰Besingandikhaphayo kwanalapho isandla sakho, Sindibambe isandla sakho sokunene.

¹¹Ukuba ndithe, Mabundisongele ubumnyama bona bodwa, Nokukhanya kube bubusuku ngeenxa zonke kum:

¹²Kwanobumnyama obo abungebi bubumnyama kuwe; Ubusuku bungaba mhlophe njengemini, Ubumnyama bungaba njengokukhanya

¹³Ngokuba wena wazibumba izintso zam, Wandibiyela esizalweni sikama.

¹⁴Ndiyabulela kuwe ngenxa enokuba ndenziwe ngokoyikekayo, ngokubalulekileyo; Zibalulekile izenzo zakho, Umphefumlo wam uyazi kakuhle.

¹⁵Ayengagushekile kuwe amathambo am, Mna ndenzelwayo entsithelweni, Ndalukwa ndayimfakamfele ezinzulwini zomhlaba.

¹⁶Amehlo akho andibona ndiseyimbumba, Zazibhalwe encwadini yakho iimini zonke ziphela; Ziyiliwe ngenxa engaphambili, Kungekabikho ke nanye kuzo.

¹⁷Kum ke zinjani na ukunqaba izicamango zakho, Thixo! Asingangani isimbuku sazo!

¹⁸Zingathi, ndizibalile, zibe ninzi ngaphezu kwentlabathi; Ndakuvuka ndoba ndisenawe.

¹⁹Ngamana wambulala ongendawo, Thixo! Nina madoda amagazi, sukani kum.

²⁰Abo bakukhankanyela amayelenqe, Balibizela inkohlakalo igama lakho abazondi bakho.

²¹Andinakubathiya na abakuthiyayo, Yehova, Ndikruquke ngabasukela phezulu kuwe?

²²Ndibathiya ngentiyo ephelelisileyo, Kum mna baziintshaba.

²³Ndigocagoce, Thixo, uyazi intliziyo yam; Ndicikide, uzazi iingcinga-ngcinga zam;

²⁴Ubone ukuba kukho ndlela yobubi na kum, Undikhaphele kwindlela engunaphakade.