IiNdumiso 78

¹Eyokuqiqa ka-Asafu. Wubekeleni indlebe umyalelo wam, bantu bakowethu, Wathobeleni indlebe amazwi omlomo wam.

²Ndiya kuwuvula umlomo wam ngomzekeliso; Ndiya kumpompozisa iintsonkotha zamandulo;

³Esakuvayo sakwazi, Abasibaliselayo oobawo.

⁴Asiyi kukugusha koonyana babo; Sobalisela isizukulwana esizayo iindumiso zikaYehova, Namandla akhe, nemisebenzi yakhe ebalulekileyo awayenzayo.

⁵Wamisa isingqiniso kwaYakobi, Wabeka umyalelo kwaSirayeli, Awawumisela oobawo, Ukuba bawazise oonyana babo;

⁶Ukuze siwazi isizukulwana esizayo, oonyana abaza kuzalwa, Basuke babalisele ababo oonyana;

⁷Bayame ngoThixo, Bangazilibali izenzo ezincamisayo zikaThixo, Bayilondoloze imithetho yakhe:

⁸Bangabi njengooyise, Isizukulwana esiyinjubaqa, esineenkani, Isizukulwana esingayilungisanga intliziyo yaso, Esimoya unganyanisanga kuThixo.

⁹Oonyana bakaEfrayim, bexhobile, beziintoli ezinezaphetha, Bajika ngemini yemfazwe.

¹⁰Abawugcinanga umnqophiso kaThixo, Abavumanga ukuhamba ngomyalelo wakhe;

¹¹Bazilibala izenzo zakhe ezincamisayo, Nezibalulekileyo zakhe awababonisayo.

¹²Phambi kooyise wenza ngokubalulekileyo Ezweni lamaYiputa, emhlabeni waseTsohan.

¹³Waludabula ulwandle, wabaweza, Wawamisa amanzi njengemfumba.

¹⁴Wabakhapha ngelifu emini, Ngokukhanya komlilo ubusuku bonke,

¹⁵Walicanda iliwa entlango, Wabaseza amanzi anzongonzongo kakhulu;

¹⁶Wavelisa imiqukuqela yamanzi engxondorheni, Wahlisa amanzi njengemilambo.

¹⁷Baqokela noko ukona kuye, Nokumphikisa Osenyangweni emqwebedwini.

¹⁸Bamlinga uThixo ngentliziyo yabo, Ngokuwubizela umphefumlo wabo ukudla.

¹⁹Bathetha ngoThixo, bathi, Unako na uThixo ukulungisa isithebe entlango?

²⁰Yabona, walibetha iliwa, abaleka amanzi, Yakhukula nemilanjana; Woba nako na nokubanika ukutya, Nokubalungiselela inyama abantu bakhe?

²¹Weva ke uThixo, waphuphuma umsindo wakhe, Watsha umlilo kwaYakobi, Kwenyuka kwaya umsindo kwaSirayeli;

²²Ngokuba bengakholwanga kuThixo, Bengakholosanga ngosindiso lwakhe.

²³Waziwisela ke umthetho iingqimba zamafu ngaphezulu, Wazivula iingcango zezulu;

²⁴Wabanisela ngemana ukuze badle, Wabanika ingqolowa yasezulwini.

²⁵Umntu wadla isonka sOnamandla; Wabathumela umphako bada badikwa.

²⁶Wandulula umoya wasempumalanga ezulwini, Wawuqhuba ngamandla akhe umoya wasezantsi;

²⁷Wabanisela inyama njengothuli, Neentaka ezinamaphiko njengentlabathi yolwandle;

²⁸Yawa phakathi kweminquba yabo, Ngeenxa zonke emakhayeni abo.

²⁹Badla, bahlutha kakhulu, Wabazisela ke inkanuko yabo.

³⁰Bengekashenxi enkanukweni yabo, Kusekho ukudla kwabo emlonyeni wabo:

³¹Kwenyuka umsindo kaThixo waya kubo, Wabulala phakathi kwabatyebileyo babo, Wawawisa amadodana akwaSirayeli.

³²Kuyo yonke loo nto bahambisa ngokona, Abakholwa yimisebenzi yakhe ebalulekileyo.

³³Wayiphelisa ke imihla yabo njengomphunga, Neminyaka yabo ngokukhwankqisa.

³⁴Xa wathi wababulala, bamquqela; Babuya bamquqela uThixo ngenyameko,

³⁵Bakhumbula ukuba uThixo uliliwa labo, UThixo Osenyangweni ungumkhululi wabo.

³⁶Ke bamthomalalisa ngomlomo wabo, Bamxokisa ngolwimi lwabo;

³⁷Intliziyo yabo ayaqina kuye, Abanyaniseka emnqophisweni wakhe.

³⁸Ke yena unemfesane, Uxolela ubugwenxa ngocamagushelo, akonakalisi; Wawubuyisa futhi umsindo wakhe, Akabuxhoxha bonke ubushushu bakhe.

³⁹Wakhumbula ukuba bayinyama, Bangumoya omkayo, ongabuyiyo.

⁴⁰Kukangaphi bemphikisa entlango, Bemenza buhlungu enkangala!

⁴¹Babuya bamlinga uThixo, Bamenzakalisa oyiNgcwele wakwaSirayeli.

⁴²Abasikhumbula isandla sakhe, Imini awabakhulula ngayo embandezelweni;

⁴³Awamisa ngayo imiqondiso yakhe eYiputa, Nezimanga zakhe emhlabeni waseTsohan.

⁴⁴Wayiguqula imijelo yabo, yaba ligazi, Ababa nakuyisela imiqukuqela yabo yamanzi.

⁴⁵Wathumela kubo iingcongconi, zabadla; Namasele, abatshabalalisa.

⁴⁶Izilimo zabo wazinika iinkumbi ezinqunquthayo, Ukuxelenga kwabo wakunika iinkumbi ezandayo.

⁴⁷Wawubulala ngesichotho umdiliya wabo, Nemithombe yabo ngomkhenkce.

⁴⁸Wayinikela kwisichotho imfuyo yabo, Nemihlambi yabo ngemibane.

⁴⁹Wathumela kubo ukuvutha komsindo wakhe, Ukuphuphuma kwawo, nokubhavuma, nembandezelo, Ibutho lezithunywa zobubi.

⁵⁰Wawulungelelanisela umendo umsindo wakhe, Akawunqanda ekufeni umphefumlo wabo, Wabunikela ubomi babo kwindyikitya yokufa.

⁵¹Wababulala bonke abamazibulo eYiputa, Iintlahlela zamandla obudoda ezintenteni zakwaHam.

⁵²Abantu bakhe wabafudusa njengezimvu, Wabaqhuba njengomhlambi entlango;

⁵³Wabakhapha bekholosile, bengankwantyi; Ke zona iintshaba zabo lwazigubungela ulwandle

⁵⁴Wabazisa emdeni wakhe ongcwele, Kule ntaba sayizuzayo isandla sakhe sokunene.

⁵⁵Wagxotha iintlanga ebusweni babo, Wazenzela amaqashiso zalilifa elicandiweyo; Izizwe zakwaSirayeli wazihlalisa ezintenteni zazo.

⁵⁶Kodwa bamlinga, bamphikisa uThixo Osenyangweni, Abazigcina izingqiniso zakhe,

⁵⁷Babuya unuva, banginiza njengooyise. Bajika njengesaphetha esikhohlisayo.

⁵⁸Bamqumbisa ngeziganga zabo, Bamkhweletisa ngemifanekiso yabo eqingqiweyo.

⁵⁹Weva uThixo, waphuphuma umsindo, Wawacekisa kakhulu amaSirayeli;

⁶⁰Wawulahla umnquba waseShilo, Intente abeyimise esintwini;

⁶¹Wawanikela ekuthinjweni amandla akhe, Isihombo sakhe esandleni sombandezeli.

⁶²Wabanikela abantu bakhe kwikrele, Umsindo wakhe waphuphumela ilifa lakhe.

⁶³Amadodana abo adliwa ngumlilo, Iintombi zabo azagcotyelwa.

⁶⁴Ababingeleli babo bawa likrele, Abahlolokazi babo abalila.

⁶⁵Yaza yavuka njengobelele iNkosi, Njengegorha elimemeleliswa yiwayini.

⁶⁶Yababetha ngasemva ababandezeli bayo, Yabenza ingcikivo engunaphakade.

⁶⁷Yayicekisa intente yakwaYosefu, Ayasinyula isizwe sakwaEfrayim.

⁶⁸Yanyula isizwe sakwaYuda, Intaba yaseZiyon eyayithandayo.

⁶⁹Yayakha njengokuphakama kwezulu ingcwele yakhe, Njengomhlaba lo awusekileyo ngonaphakade.

⁷⁰Yanyula uDavide umkhonzi wayo, Yamthabatha ezibayeni zezimvu;

⁷¹Yamthabatha elandela izimvu ezanyisayo, Yamzisa ukuba aluse kwaYakobi abantu bayo, KwaSirayeli ilifa layo.

⁷²Wabalusa ke ngengqibelelo yentliziyo yakhe, Wabakhapha ngokwazi kwezandla zakhe.