1 Korinte 10

¹Ngokuba angithandi, bazalwane, ukuba ningazi ukuthi okhokho bethu bonke babephansi kwefu, bonke badabula ulwandle;

²bonke baphapathizwa kuMose efwini naselwandle;

³bonke badla kudla kunye komoya;

⁴bonke baphuza kuphuza kunye komoya; ngokuba baphuza edwaleni lomoya elabalandelayo. Idwala lelo lalinguKristu.

⁵Kepha iningi labo uNkulunkulu wayengathokozi ngabo; ngokuba bashaywa phansi ehlane.

⁶Kepha lokho kwaba yizibonelo kithi, size singafisi okubi, njengalokho bona babekufisa.

⁷Futhi ningabi ngabakhonza izithombe njengabanye kubo, njengokulotshiweyo ukuthi: “Abantu bahlala phansi ukuba badle, baphuze, basukuma ukuba badlale.”

⁸Futhi asingenzi ubufebe njengokuba abanye kubo benza ubufebe, bafa ngalusuku lunye abayizinkulungwane ezingamashumi amabili nantathu.

⁹Futhi asingayilingi iNkosi njengabanye kubo bayilinga, babhujiswa yizinyoka.

¹⁰Futhi ningakhononi njengabanye kubo bakhonona, babhujiswa ngumbulali.

¹¹Kepha lezo zinto zabehlela bona kube yisibonelo; kulotshelwe ukusiyala thina, osekufikile kithi ukugcina kwezikhathi.

¹²Ngakho-ke osuka ethi umi, akaqaphele ukuba angawi.

¹³Anifikelwanga ukulingwa okungenjengokwabantu; kepha uNkulunkulu uthembekile, ongayikuvuma ukuba nilingwe ngokungaphezu kwamandla enu, kepha oyakuthi kanye nokulingwa anenzele indlela yokuphepha, nize nibe namandla okukuthwala.

¹⁴Ngalokho-ke, bathandwa bami, kubalekeleni ukukhonza izithombe.

¹⁵Ngikhuluma njengakwabahlakaniphileyo; qondani engikushoyo.

¹⁶Isitsha sesibusiso esisibusisayo asiyiyo inhlanganyelo yegazi likaKristu na? Isinkwa esisihlephulayo asiyiyo inhlanganyelo yomzimba kaKristu na?

¹⁷Ngokuba isinkwa sisinye, thina esibaningi singumzimba munye, lokhu thina sonke sihlanganyela leso sinkwa sinye.

¹⁸Bhekani u-Israyeli ngokwenyama. Abadla imihlatshelo abasibo abahlanganyela ne-altare na?

¹⁹Ngakho ngithini pho? Ngithi okuhlatshelwe isithombe kuyinto na? nokuthi isithombe siyinto na?

²⁰Kodwa ngithi: Lokho okuhlatshwa ngabezizwe bakuhlabela amademoni, kabakuhlabeli uNkulunkulu. Kepha angithandi ukuba nibe nenhlanganyelo namademoni.

²¹Ningesiphuze isitsha seNkosi kanye nesitsha samademoni; ningelihlanganyele itafula leNkosi kanye netafula lamademoni.

²²Kumbe siyayivusela iNkosi ulaka na? Kanti sinamandla kunayo na?

²³Kuvunyelwe konke, kodwa akusizi konke; kuvunyelwe konke, kodwa akwakhi konke.

²⁴Akungabikho ozifunela okwakhe, kodwa akube yilowo nalowo afunele omunye.

²⁵Konke okuthengiswa esilaheni kudleni, ningahloli lutho ngenxa kanembeza,

²⁶ngokuba umhlaba ungoweNkosi, nakho konke okukuwo.

²⁷Uma omunye kwabangakholwayo enimema, nithanda ukuya, kudleni konke okubekwa phambi kwenu, ningabuzi lutho ngenxa kanembeza.

²⁸Kepha uma umuntu ethi kini: “Lokhu kuhlatshelwe izithombe,” ningakudli ngenxa yalowo okushiloyo nangenxa kanembeza,

²⁹kangisho owakho unembeza, ngisho owalowo omunye. Ngokuba yini ukuba inkululeko yami yahlulwe ngunembeza womunye na?

³⁰Uma ngidla ngokubonga, ngihlanjalazelwani ngalokho engikubongayo na?

³¹Ngakho-ke noma nidla, noma niphuza, noma nenzani, konke kwenzeleni udumo lukaNkulunkulu.

³²Ningakhubekisi nabaJuda, namaGreki, nabandla likaNkulunkulu,

³³njengokuba nami ngithokozisa bonke ngakho konke, ngingafuni okungisiza mina kodwa okusiza abaningi, ukuze basindiswe.