Efesu 5

¹Ngakho yibani ngabalingisa uNkulunkulu njengabantwana abathandekayo,

²nihambe othandweni, njengalokho uKristu wanithanda, wazinikela ngenxa yethu, abe ngumnikelo nomhlatshelo, abe yiphunga elimnandi kuNkulunkulu.

³Kepha ubufebe, nakho konke ukungcola, noma isangabe, makungaphathwa nangegama phakathi kwenu, njengokuba kufanele abangcwele,

⁴nehlazo, nokubheda, nokulawula, okuyizinto ezingafanele, kepha kunalokho makube ngukubonga.

⁵Ngokuba yazini lokhu, nikuqonde ukuthi akukho sifebe, noma ongcolileyo, noma onesangabe ongokhonza izithombe, onefa embusweni kaKristu noNkulunkulu.

⁶Masingakhohliswa muntu ngamazwi ayize, ngokuba ngenxa yalezo zinto ulaka lukaNkulunkulu lwehlela phezu kwabantwana bokungalaleli.

⁷Ngakho-ke ningabi ngabahlanganyela nabo.

⁸Ngokuba kade naningubumnyama, kepha manje ningukukhanya eNkosini; hambani njengabantwana bokukhanya,

⁹ngokuba izithelo zokukhanya zisebuhleni bonke nasekulungeni naseqinisweni,

¹⁰nihlole ukuthi kuyini okuthandeka eNkosini,

¹¹ningahlanganyeli imisebenzi yobumnyama engenazithelo, kepha kunalokho niyidalule;

¹²ngokuba okwenziwa yibo ngasese kuyihlazo nokukhuluma ngakho.

¹³Kepha konke okudalulwayo kubonakaliswa ngukukhanya, ngokuba konke okubonakaliswayo kungukukhanya.

¹⁴Ngalokho uthi: “Phaphama wena oleleyo, uvuke kwabafileyo, uKristu uzakukukhanyisa.”

¹⁵Ngakho-ke bhekisisani ukuthi nihamba kanjani, kungabi njengabangahlakaniphile kepha njengabahlakaniphileyo,

¹⁶nithengisise isikhathi, ngokuba izinsuku zimbi.

¹⁷Ngakho-ke ningabi yiziwula, kodwa qondani okuyintando yeNkosi.

¹⁸Ningadakwa yiwayini, kuvela kulo umhumheko, kodwa nigcwaliswe ngoMoya,

¹⁹niphendulane ngamahubo nangezihlabelelo nangamaculo okomoya, nihlabelele, nihubele iNkosi enhliziyweni yenu,

²⁰nimbonge njalo uNkulunkulu uYise ngakho konke egameni leNkosi yethu uJesu Kristu,

²¹nithobelane ngokumesaba uKristu.

²²Abafazi mabathobele amadoda abo kungathi kukuyo iNkosi,

²³ngokuba indoda iyinhloko yomfazi, njengokuba noKristu uyinhloko yebandla, yena engumsindisi womzimba.

²⁴Kepha njengokuba ibandla lithobela uKristu, kanjalo nabafazi mabathobele amadoda ezintweni zonke.

²⁵Madoda, thandani omkenu, njengalokho noKristu ulithandile ibandla, wazinikela ngenxa yalo

²⁶ukuba alingcwelise, alihlambulule ngesigezo samanzi ngezwi,

²⁷ukuze azimisele ibandla elinenkazimulo, lingenasisihla, nambimbi, nanto enjalo, kodwa libe ngcwele lingenacala.

²⁸Kanjalo amadoda afanele ukuthanda omkawo njengemizimba yawo. Othanda umkakhe uzithanda yena.

²⁹Ngokuba akakho owake wazonda eyakhe inyama, kepha uyayondla, ayiphathe kahle, njengalokhu noKristu enza kulo ibandla;

³⁰ngokuba singamalungu omzimba wakhe.

³¹Ngenxa yalokho umuntu uyakushiya uyise nonina, anamathele kumkakhe; labo ababili bayakuba nyamanye.

³²Le mfihlakalo inkulu, kepha ngikhuluma ngoKristu nebandla.

³³Nani-ke, yilowo nalowo makathande umkakhe njengokuba ezithanda yena, kepha umfazi makahloniphe indoda yakhe.