Jobe 36

¹U-Elihu waqhubeka wathi:

²“Ngihlalele kancane, ngiyakukubonisa, ngokuba ngisenamazwi okummela uNkulunkulu.

³Ngiyakulanda kude ulwazi lwami, nginike uMenzi wami ukulunga.

⁴Impela amazwi ami awasiwo amanga; unawe ophelele ekwazini.

⁵“Bheka, uNkulunkulu unamandla, kepha kadeleli muntu; mkhulu emandleni okuqonda.

⁶Akenzi ukuba omubi aphile, kepha abampofu uyabanika ukwahlulelwa.

⁷Akabuyisi amehlo akhe kwabalungileyo, kepha ubahlalisa namakhosi ezihlalweni zobukhosi, baphakame kuze kube phakade.

⁸Uma beboshwa ngamaketanga, babanjwe ngezintambo zokuhlupheka,

⁹uyababonisa izenzo zabo neziphambeko zabo zokuthi baziphakamisile.

¹⁰Uyavulela izindlebe zabo ukulaywa, asho ukuba babuye ebubini.

¹¹Uma belalela, bamkhonze, bayakuqeda imihla yabo ebuhleni neminyaka yabo kukho okumnandi.

¹²Kepha uma bengalaleli, bayakuphela ngenkemba, bafe bengenalwazi.

¹³“Abangesabi ngenhliziyo baqongelela ulaka; abakhali lapho ebabopha.

¹⁴Bafa besebasha, ukuphila kwabo kube njengokwezifebe zethempeli.

¹⁵Ukhulula ompofu ngobumpofu bakhe, avule indlebe yabo ngokuhlupheka.

¹⁶“Yebo, nga ekuvusa ukuba uphume emlonyeni wosizi, uye endaweni ebanzi, lapho kungekho kunyinyeka khona, kunone okubekwa etafuleni lakho.

¹⁷Kepha ugcwele ukwahlulelwa kwababi; ukwahlulela nokulunga kuyakubamba.

¹⁸Xwaya ukuba ulaka lungakuvusi usashaywa, ungachezukiswa ngobuningi bamahlawulo.

¹⁹Ukukhala kwakho kungakusiza ukuba ungahlali osizini, nazo zonke izikhwepha zamandla akho, na?

²⁰Ungafisi ubusuku, lapho abantu beyakususwa ezindaweni zabo.

²¹Xwaya ukuba ungabhekisi ubuso bakho ebubini, ngokuba ukhethile lokho kunokuhlupheka.

²²“Bheka, uNkulunkulu uphakeme ngamandla akhe; ngubani ofundisa njengaye na?

²³Ngubani ommisele indlela yakhe na? Ngubani ongasho ukuthi: ‘Wenzile okubi,’ na?

²⁴Khumbula ukukhulisa izenzo zakhe abahlabelela ngazo abantu.

²⁵Bonke abantu bayazibona; abokufa bayazibuka besekude.

²⁶Bheka, uNkulunkulu uphakeme, asimqondi; umumo weminyaka yakhe ayinakuphenywa.

²⁷“Wenyusa amathonsi amanzi, abuye awathulule njengemvula enkungwini yakhe;

²⁸amafu awenza ukuba aconse, awathele phezu kwabantu abaningi.

²⁹Ukhona ongaqonda ukwenekeka kwamafu nokuduma kwedokodo lakhe na?

³⁰Bheka, uyasakaza ukukhanya kwakhe ngakuye; uyasibekela ubuphansi bolwandle.

³¹Ngokuba ngalokho uyabahlulela abantu, aphane kakhulu ngokudla.

³²Uyasibekela izandla zakhe ngokukhanya, akuyale ukuba kushaye isigcibisholo.

³³Umsindo wakhe ulanda ngaye oshisekela ububi ngentukuthelo.