Marku 3

¹Khona wabuye wangena esinagogeni. Kwakukhona lapho umuntu onesandla esishwabeneyo.

²Bamqaphela ukuba uzakumphilisa yini ngesabatha, ukuze bambeke icala.

³Wathi kumuntu onesandla esishwabeneyo: “Sukuma, ume phakathi.”

⁴Wayesethi kubo: “Kuvunyelwe ngesabatha ukwenza okuhle noma okubi yini, ukusindisa umuntu noma ukumbulala na?” Kepha bathula.

⁵Waqalaza ebabuka ngokuthukuthela, edabukile ngobulukhuni benhliziyo yabo; wayesethi kulowo muntu: “Yelula isandla.” Waselula, saphiliswa isandla sakhe.

⁶AbaFarisi base bephuma masinyane bacebisana ngaye nabakaHerode ukuthi bangambhubhisa kanjani.

⁷UJesu wasuka kanye nabafundi bakhe, waya ngaselwandle; isixuku esikhulu samlandela sivela eGalile, naseJudiya,

⁸naseJerusalema, nase-Idumiya, nangaphesheya kweJordani, nangaseTire, naseSidoni; isixuku esikhulu sesizwile konke akwenzayo seza kuye.

⁹Wayeseyala abafundi bakhe ukuba isikebhe simlindele ngenxa yesixuku sabantu, ukuze bangamcindezeli,

¹⁰ngokuba wayephulukisa abaningi, kwaze kwathi bonke abanezifo bawela phezu kwakhe ukuba bamnamathe.

¹¹Nawomoya abangcolileyo bathi ukuba bambone, bawa phansi phambi kwakhe, bamemeza bathi: “Wena uyiNdodana kaNkulunkulu.”

¹²Wabayalisisa ukuba bangamzwakalisi.

¹³Wayesenyukela entabeni, wabizela kuye abebafuna yena; beza kuye.

¹⁴Wamisa abayishumi nambili ukuba babe naye nokuba abathume baye kushumayela,

¹⁵babe namandla okukhipha amademoni.

¹⁶Wayesemisa laba abayishumi nambili: uSimoni owamqamba igama lokuthi uPetru,

¹⁷noJakobe kaZebedewu, noJohane umfowabo kaJakobe; laba wabaqamba igama lokuthi oBowanergesi okungukuthi amadodana okuduma;

¹⁸no-Andreya, noFiliphu, noBartolomewu, noMathewu, noTomase, noJakobe ka-Alfewu, noThadewu, noSimoni umKhanani,

¹⁹noJuda Iskariyothe owamkhaphelayo.

²⁰Wayesefika ekhaya; isixuku sabuthana futhi, ababe besaba nathuba lokudla nasinkwa.

²¹Abakubo sebekuzwile baphuma ukuyombamba, ngokuba bathi uyahlanya.

²²Nababhali abehla bevela eJerusalema bathi: “UnoBelzebule, ukhipha amademoni ngombusi wamademoni.”

²³Wayesebabiza, wakhuluma kubo ngemifanekiso, ethi: “USathane angakhipha kanjani uSathane na?

²⁴Uma umbuso wahlukene wodwa, lowo mbuso ungeme.

²⁵Nendlu, uma yahlukene yodwa, leyo ndlu ayizukuma.

²⁶NoSathane, uma ezivukela yena, ahlukane, akanakuma, kepha uyaphela.

²⁷Yebo, akakho ongangena endlini yesiqhwaga, aphange impahla yaso, uma engabophi kuqala isiqhwaga, andukuba aphange indlu yaso.

²⁸Ngiqinisile ngithi kini: Abantwana babantu bayakuthethelelwa izono zonke nokuhlambalaza noma kungakanani abangahlambalaza ngakho,

²⁹kepha lowo ohlambalaza uMoya oNgcwele kanakuthethelelwa naphakade, kodwa unecala lesono esingapheliyo.”

³⁰Ngokuba bathi unomoya ongcolileyo.

³¹Kwase kufika unina nabafowabo, bema ngaphandle, bathumela kuye bembiza.

³²Isixuku sabantu sasimphahlile; bathi kuye: “Bheka, unyoko nabafowenu nawodadewenu bangaphandle bekufuna.”

³³Wabaphendula wathi: “Ngubani umame nabafowethu na?”

³⁴Waqalaza ebuka ababehlezi bemphahlile, wathi: “Bhekani, nangu umame nabafowethu.

³⁵Ngokuba owenza intando kaNkulunkulu nguye ongumfowethu nodadewethu nomame.”